Մայիսյանի գյուղացիները փակել էին ճանապարհը. Արազի ջրով այլևս չեն կարողանում ոռոգել դաշտերը

Այսօր առավոտյան Երևան-Արմավիր մայրուղին Մայիսյան գյուղի բնակիչները երկկողմանի փակել էին: Մայիսյանի գյուղապետ Եսայի Մովսիսյանը Yerkir.am-ի հետ զրույցում նշեց, որ գյուղացիների բողոքի պատճառը ոռոգման ջուրն է:

«Մինչ այս բնակիչներն իրենց դաշտերը ոռոգել են Արազ գետի ջրով, սակայն հիմա քանի որ ջրի մակարդակն իջել է, այլևս չեն կարողանում այն օգտագործել: Ոչ մի տարի նման խնդիր չենք ունեցել, հիմա երևի պետք է թուրքերի հետ բանակցություններ լինեն և ջրի օգտագործման ծավալները մի փոքր ավելացնեն»,-ասաց գյուղապետը:

Նա տեղեկացրեց նաև, որ գյուղացիներն Ախուրյանի ջրամբարի ջրով են սկսել ոռոգել այգիները, սակայն քանի որ այսօր կիրակի է` ոչ ախատանքային օր, ջրամբարի ջուրը դեռ չէին բացել: Մովսիսյանի հավաստմամբ` քիչ առաջ պատկան մարմինների ներկայացուցիչները գյուղացիների հետ հանդիպել են ու խոստացել, որ մինչև երեկո ջուրը կլինի, գյուղացիներն էլ ճանապարհը բացել են: