Ամռանը հանգստյան և տոնական օրերին կազմակերպել ժամանցային միջոցառումներ. վարչապետ

ՀՀ վարչապետ Կարեն Կարապետյանի` կառավարության նիստում հանձնարարականներից մեկը վերաբերում էր ամռան ամիսներին քաղաքացիների և զբոսաշրջիկների հանգստի կազմակերպմանը:

«Նկատի ունենալով ամառային շրջանի սկիզբը և կարևորելով հանրապետությունում զբոսաշրջային միջավայրի ձևավորումը` հանձնարարում եմ մշակույթի, տարածքային կառավարման և զարգացման, սպորտի և երիտասարդության հարցերով նախարարներին, մարզպետերին, զբոսաշրջային պետական կոմիտեի նախագահին և քաղաքապետին` մեկշաբաթյա ժամկետում մշակել և կառավարության աշխատակազմին ներկայացնել ամռան ամիսներին հանգստյան և տոնական օրերին այգիներում, պուրակներում քաղաքացիներ և զբոսաշրջիկների համար ժամանցի կազմակերպման միջոցառումների ծրագրեր»,- ասաց նա:

Վարչապետը նշեց, որ այդ ծրագրերում պետք է ընդգրկվեն բացօթյա կինոթատրոններ, համերգներ, ներկայացումներ, սպորտային միջոցառումներ, ամառային ճամբարներ և այլն: Նա կոչ արեց այդ միջոցառումներում ընդգրկել շահագրգիռ կառույցներին և այդ միջոցառումների ծրագրերի վերաբերյալ ապահովել տեղեկատվության հասանելիություն: