«Հուսամ՝ Օբամայի վարչակազմի օրոք արված սխալները չեն կրկնվի». մանրամասներ՝ Էրդողա-Թրամփ հանդիպումից

Երեկ Վաշինգտոնում կայացավ ԱՄՆ նախագահ Դոնալդ Թրամփի և Թուրքիայի նախագահ Էրդողանի հանդիպումը:

Ըստ Demokrathaber-ի՝ Թրամփի հետ հանդիպման ժամանակ Էրդողանը վստահություն է հայտնել թուրք-ամերիկյան հարաբերությունների զարգացման կապակցությամբ:

Թուրքիայի նախագահը հերթական անգամ անդրադարձել է իրենց երկրում ահաբեկչական համարվող քրդական խմբավորումների՝ ԱՄՆ-ի կողմից աջակցությանը: Էրդողանը նշել է, որ Թուրքիան երբեք չի ընդունի ԱՄՆ-ի և Սիրիայի տարածքում գործող քրդական ազգային ինքնապաշտպանության ջոկատների համագործակցությունը։ 

Նա նաև հույս է հայտնել, որ Թրամփի նախագահության օրոք չեն կրկնվի նախկին նախագահ Բարաք Օբամայի վարչակազմի թույլ տված սխալները:

Բացի քուրդ զինյալների հարցից, Թրամփի հետ հանդիպման ժամանակ Էրդողանը բարձրացրել է իր համար ամենակարևոր՝ Ֆեթուլլահ Գյուլենի արտահանձնման, ինչպես նաև ադրբեջանցի գործարար Ռեզա Զարրաբի հարցերը, որոնց մասին հավելյալ մանրամասներ չեն հաղորդվում:

Հիշեցնենք, որ Թուրքիայում «Մեծ կաշառք» հակակոռուպցիոն գործողության ժամանակ ձերբակալված, այնուհետև ազատ արձակված ադրբեջանցի գործարար Ռեզա Զարրաբը 2016-ի մարտի 19-ին ձերբակալվել էր ԱՄՆ-ում: Զարրաբը մեղադրվում էր Իրանի դեմ պատժամիջոցները շրջանցելու փորձի, փողերի լվացման, ինչպես նաև բանկային խարդախության մեջ: Ադրբեջանցի գործարարն ու նրա աջակիցները բազմամիլիոնանոց գործարքներ են իրականացրել, որոնց շահառուն եղել են Իրանի կառավարությունը և իրանական մի քանի ընկերություններ: Նրանցից յուրաքանչյուրին սպառնում էր մի քանի տասնյակ տարվա ազատազրկում։

«Մեծ կաշառք» գործողության ցուցակում, բացի Զարրաբից, հայտնվել էին նաև Էրդողանի ընտանիքի անդամների ու Թուրքիայի մի շարք ղեկավարների անունները: Էրդողանի աջակցությունը վայելող Զարրաբը և մյուս ձերբակալվածները կարճ ժամանակ անց ազատ էին արձակվել: