Ապահովագրական ոլորտ երևի չվերադառնամ. ինչ կանի առողջապահության նախարարը, եթե չվերանշանակվի

Եթե այնպես որոշվի, որ այլևս չպիտի պաշտոնավարեմ` որպես նախարար, այդ դեպքում ապահովագրական ոլորտ երևի չվերադառնամ. լրագրողներին ասաց ՀՀ առողջապահության նախարար Լևոն Ալթունյանը` խոսելով իր` նախարարի պաշտոնում մնալ-չմնալու մասին:

Նա նշեց նաև, որ եթե հեռանա պաշտոնից, որոշ նախագծեր ունի, դրանցով կզբաղվի: Այլ մանրամասներ նախարարը հրաժարվեց ներկայացնել: «Կառավարությունը կոլեգիալ համակարգ է, և միասին պետք է ինչ-որ որոշման հանգել: Իսկ, առհասարակ, անցած 8 ամիսների ընթացքում մենք որոշեցինք նախագծեր կյանքի կոչել, որոնք եթե առաջիկա 3-4 տարիների ընթացքում իրականացնենք, ապա կունենանք առողջապահական ամբողջական համակարգ»,- ասաց նախարարը: