Գնաճը պետք է հետ գա իր բնականոն մակարդակին. ֆինանսների նախարար

ՀՀ ֆինանսների նախարար Վարդան Արամյանը կառավարության նիստից հետո լրագրողների հետ զրույցում անդրադարձավ վարչապետ Կարեն Կարապետյանի՝ արտակարգ ռեժիմով աշխատելու հորդորին:

«Արտակարգ ռեժիմը բառի բուն իմաստով նշանակում է, որ մենք պետք է շարունակենք աշխատել ոչ թե մեզ տրված ութ ժամը` օրական ռեժիմով, այլ աշխատելու ենք 10-12 ժամ՝ ներառյալ շաբաթ օրերը»,- ասաց նա:

Նախարարը հավելեց, որ կառավարությունը մի քանի անգամ է հայտարարել,  որ շատ ավելի բարձր նշաձող է վերցրել,  քան այլ հավասար պայմաններում կարող էր իրականացվել, դրա համար պարտավոր են աշխատել շատ ավելի երկար:

Լրագրողները հարցրեցին վերջերս նկատվող գնաճի մասին: Նախարարը նշեց, որ գնաճը պետք է հետ գա իր բնականոն մակարդակին, այսօրվա դրությամբ եղել է  դեֆլացիա, և նորմալ է, որ Հայաստանի տնտեսությունն ունենա  շուրջ չորս տոկսանոց գնաճ: Ըստ Արամյանի` դա կնպաստի  տնտեսական աճին: Նա նշեց, որ գնաճը  տնտեսագիտական կատեգորիա է, և շատ նորմալ է որ, միջնաժամկետում հետ գանք 4 տոկոսանոց թիրախին: Նախարարի խոսքով` գնաճի վրա ազդում են տարբեր ցուցանիշներ՝ արտաքին աշխարհից եկող բացասական ազդեցությունները և ներքին տնտեսությունում պահանջարկի շուկան:
«Բնականաբար, Կենտրոնական բանկն իր ջանքերը պետք է ուղղի, որ գնաճը հետ բերի չորս տոկոսանոց թիրախային միջավայրի, ինչը անում է»,-ասաց նա:

Վարդան Արամյանը խոսեց նաև կապիտալ ծախսերի մեծացման անհրաժեշտության մասին և ասաց. «Մենք ծրագրից ավելի փորձելու ենք հարկեր հավաքել և դրանք վերաուղղել կապիտալ ծախսերի»: