Իմ խնդրանքն է, որ չծախվող մարդիկ այս անգամ տեր կանգնեն իրենց ձայնին. Աղվան Վարդանյան

Այսօր լրագրողների հետ հանդիպեց ՀՅԴ Գերագույն մարմնի ներկայացուցիչ Աղվան Վարդանյանը` ամփոփելով ՀՅԴ նախընտրական քարոզարշավը:

«Ես հույս ունեմ, որ այս ընտրություններում ԸՕ փոփոխությունների շնորհիվ`տեխնիկական միջոցներով, ցուցակների հրապարակմամբ պայմանավորված, հնարավոր կլինի ընտրախախտումները նվազագույնի հասցնել ընտրատեղամասերում: Գրեթե վստահ եմ, որ տեղամասերում խախտում չի լինի, իսկ սա ենթադրում է, որ եթե մենք այս ընտրություններում մասնակիցների թվի էական  փոփոխություն ունենանք` նախորդների համեմատ, եթե ընտրություններին մասնակցած ընտրողների թիվը չանցնի 1 միլիոն 200 հազարը, ապա կհամարեմ, որ սա արդեն հաղթանակ է, և որ ընտրական համակարգն արդեն իր արդյունքը տվել է: Հույս ունեմ, որ այս համակարգային փոփոխություններից հետո, երբ ԱԺ-ն դառնում է միակ բարձրագույն մարմինը, մեր հարյուրհազարավոր այն քաղաքացիները, ովքեր չէին վստահում ընտրություններին, չէին գնում ընտրության, նրանց մի մասը կմասնակցի այս ընտրություններին»,- ասաց Աղվան Վարդանյանը:

Նրա համոզմամբ` այդ մարդիկ մտահոգ, շիտակ, ազնիվ են, ընտրակաշառք չեն վերցնի, որովհետև եթե ընտրակաշառք վերցնեին, ապա նախորդ ընտրություններին կգնային ընտրության: Աղվան Վարդանյանը հույս հայտնեց, որ այդ մարդկանց մի մասը կընկալի ընտրական համակարգի դրական փոփոխությունները, կհավատա, որ ընտրություններով հնարավոր է բան փոխել:

«Իմ հորդորն ու խնդրանքն է, որ եթե այդ մարդիկ, ովքեր ծախվող չեն, ովքեր ընտրակաշառք չեն վերցնում, իսկապես տեր լինեն իրենց ձայնին, մասնակցեն ընտրություններին, Դաշնակցության արդյունքներն ավելի բարձր կլինեն»,- ասաց նա:

Աղվան Վարդանյանի համոզմամբ` ՀՀ քաղաքացիները և' պատճառ, և' իրավունք ունեն երկրի ապագային նայելու լավատեսությամբ, հույսով, վստահությամբ, որ կարող են երկիրը դարձնել զարգացող, կազմակերպված, ուժեղ: «Հույս ունեմ, որ մեր քաղաքացիների գերակշիռ մասը հուսահատությունը, հուսալքությունը, անվստահությունն այս անգամ պետք է փորձի թոթափել` հավատալով, որ կարող է երկրում բան փոխել»,- ասաց Աղվան Վարդանյանը: