Կարո Փայլանի՝ կալանքի տակ գտնվող կուսակիցները հացադուլ են հայտարարել

Թուրքիայի քրդամետ Ժողովուրդների դեմոկրատական կուսակցության կալանավորված պատգամավորները հայտարարել են հացադուլ սկսելու մասին:

Ըստ Demokrathaber-ի՝ հացադուլ հայտարարելու մասին առաջինը հայտարարել են Էդիրնեի բանտում գտնվող՝ կուսակցության համանախագահ Սելահաթթին Դեմիրթաշը և Հաքքարիից ընտրված պատգամավոր Աբդուլլահ Զեյդանը: Հացադուլին միացել են Սիլիվրիի բանտում գտնվող պատգամավորներ Մերալ Դանըշ Բեշթաշը, Այհան Բիլգենը և Նիհաթ Աքդողանը:

Ըստ կայքի՝ Թուրքիայի տարբեր բանտերում շուրջ 44 օր է՝ անժամկետ հացադուլ են անում Քուրդիստանի բանվորական կուսակցության և «Քուրդիստանի ազատ կյանք» կուսակցության անդամները՝ պահանջելով մեղմացնել քրդերի առաջնորդ Աբդուլլահ Օջալանի բանտային պայմանները, վերացնել բանտերում ճնշումները և բանտարկյալների իրավունքների խախտումները: Նրանք պահանջում են նաև վերացնել արգելքներն այն գյուղերում, որտեղ ռազմական գործողություններ են իրականացվում: