Բարեգործությունն արարք չէ, այն սրտի դիրք է. բարերար Արտակ Սարգսյանի հակաքարոզչությունը

Բարեգործությունը մտքի խոյանք է, սրտի բողբոջանք ու հոգու թրթռանք. գրեթե նման տեքստով է սկսվում ՀՀԿ-ական Արտակ Սարգսյանի բարեգործական արարքներին նվիրված լայնածավալ ու խորաշունչ, պաթոսախեղդ տեսանյութը:

Տեսանյութում առնական ձայնով տեքստ կարդացողը Մանսուրյանի երաժշտության ներքո պատմում է, թե ինչպես է Արտակ Սարգսյանն «առանց փառասիրության, չհետապնդելով շահադիտական նպատակներ», աջ ու ձախ բարեգործություն անում: Ավելին` քանդակագործ Լևոն Թոքմաջյանն էլ խրոխտ ու վստահ ձայնով ասում է.«Բարեգործությունը Աստծո կողմից մարդուն տրված մի պարգև է, որը մարդու մոտ կա'մ կա, կա'մ չկա»: Թոքմաջյանի դերն այդքանով ավարտվում է`նա այդպես էլ չի բացում փակագծերը` Արտակ Սարգսյանի մոտ կա՞, թե՞ չկա այդ` ի վերուստ բխվող մանանան: Սակայն Թոքմաջյանի կիսատ թողած խոսքը գալիս են լրացնելու կադրերը նրանց, ում երբևէ ինչ-որ հարցում աջակցել է Սարգսյանը:

Հիմա լրջանանք. ստացվում է` Արտակ Սարգսյանը մարդկանց լավություն է արել, հետո կանգնեցրել էկրանի առջև, որ շնորհակալություն հայտնեն: Հավանաբար, Սարգսյանը վարպետության դասեր է ստացել ԴԱՀԿ-ի նախկին պետ, իր կուսակից ընկերոջից` Միհրան Պողոսյանից, ով էլ զոհված զինծառայողների մայրերին էր բեմ հրավիրում` իրեն ուղղված շնորհակալական տեքստ լսելու համար:

Մարդկանց մեղադրել չենք կարող. լավություն են արել, իրենք էլ պատրաստ են շնորհակալություն հայտնել, ուղղակի բարեգործություն անողը չգիտի` բարեգործությունը «շնորհակալություն» բառը լսելու համար չէ: Ավելին` տեսանյութում ասվում է, թե բարեգործությունն արարք չէ, այն սրտի դիրք է` մոռանալով հավելել, որ սրտի դիրք տանող ճանապարհը տեսանյութերը չեն և ոչ էլ բարեգործությունը հրապարակային դարձնելը: Իսկ միգուցե պե՞տք չէ երեխայի հիվանդությունն ի ցույց աշխարհի ներկայացնել, միգուցե նա մեծանում ու չի ուզում, որ իմանան` մանկության տարիներին լուրջ խնդիր է ունեցել: Բայց չէ, կարևորը երեխայի ճակատագիրը չէ` առջևում ընտրություններ են, և բարին ավետող ու բարին գործող Արտակ Սարգսյանը տարիներ կամ ամիսներ առաջ մարդկանց արած լավությունը կարծես չի մոռացել, զուտ բարի նպատակներով էլ նկարահանող խմբին ուղարկել է այդ ընտանիքներ` իր մասին ճշմարտությունը հանրությանը պատմելու, իր կերպարն ըստ արժանվույն ներկայացնելու համար:

Արտակ Սարգսյանի քարոզչությունը հակաքարոզչություն է դառնում, մանավանդ այն ֆոնին, երբ լրատվամիջոցներն ահազանգում են, որ նա ակտիվորեն սկսել է ընտրակաշառք բաժանել ու ձայներ հավաքագրել: Բացի այդ` բարեգործությունը, որին հատուկ անդրադարձ է կատարվում ընտրություններից առաջ, նույնպես ընտրակաշառքի ձև է: Ստացվում է` բարեգործը պաշտոն ստանալու համար գնում է իր ձայները. ի՜նչ բարեգութ է հնչում:

Ժողովրդական խոսք կա` «Լավություն արա` ջուրը գցիր», բայց Սարգսյանը «ժողովրդական» նոր խոսքի հիմքն է դնում` «Լավություն արա, հետո աչքը խոթիր»: 

Կ. Հ.

Տեսանյութը Slaq.am-ի