Մենք մտադիր չենք բավարարվել ունեցածով. Սերժ Սարգսյանի հոդվածը` Известия-ում

Չնայած ԼՂ հակամարտության խնդրին և դրա հետ կապված դժվարություններին` Հայաստանը կարողացավ զարգացման մակրոտնտեսական պայմաններ ապահովել. ռուսական Известия պարբերականում հրապարակած հոդվածում գրել է Հայաստանի Հանրապետության նախագահ Սերժ Սարգսյանը:

Նա նշել է, որ դա գնահատում են նաև ՀՀ-ի գործընկերները: «Հայաստանը միջազգային վարկանիշային գործակալությունների կողմից, բիզնեսի ստեղծման և վարման առումով, ամենալիբերալ երկրների ցանկում է ընդգրկվել:

Առաջնահերթ խնդիրներից է երկրում գործնական և ներդրումային կլիմայի բարելավումը: Հայաստանում ներդրումների առավելություններից մեկն այն է, որ մենք առևտրի արտոնագրային ռեժիմ ունենք շատ երկրների հետ և ազատ առևտրի գոտու մասին համաձայնագրեր` ԱՊՀ գրեթե բոլոր երկրների հետ: ԵՏՄ-ին միանալուց հետո մեր տնտեսական և առևտրային հնարավորություններն ընդլայնվեցին, մեր առջև բացվեց ԵՏՄ անդամների` 180 միլիոնանոց սպառողական շուկան:

Հայաստանի առևտրատնտեսական առանցքային գործընկերը, ամենատարբեր ոլորտներում հիմնական ներդրողը Ռուսաստանն է:  Սակայն մենք մտադիր չենք բավարարվել ունեցածով: Մեր համագործակցության ներուժը, անկասկած, ավելի լայն է»,- նշել է ՀՀ նախագահը: