Գլխավոր դատախազն ընդունել է պատգամավորների երաշխավորագիրը. Հաց բերողն ազատ կարձակվի

Քիչ առաջ մի խումբ պատգամավորներ հանդիպել են ՀՀ գլխավոր դատախազ Արթուր Դավթյանի հետ՝ քննարկելով «Սասնա ծռեր» խմբին օժանդակելու մեջ մեղադրվող Արթուր Սարգսյանի (Հաց բերող) խափանման միջոցը փոխելու վերաբերյալ հարցը: Այս մասին քիչ առաջ ուղիղ եթերով հայտարարեց ԱԺ պատգամավոր Նիկոլ Փաշինյանը:

Գլխավոր դատախազը պատգամավորներին տեղեկացրել է, որ իրենք պատրաստ են ընդունել նրանց կողմից ներկայացված անձնական երաշխավորության միջնորդությունը և Հաց բերողին կալանքից ազատ արձակել:

Այժմ ԱԺ պատգամավորներ Նիկոլ Փաշինյանը, Էդմոն Մարուքյանը, ՀՅԴ խմբակցության անդամ Միքայել Մանուկյանը գտնվում են «Դատապարտյալների հիվանդանոց» ՔԿՀ–ի մոտ:

«Մենք այժմ կմտնենք ՔԿՀ և գործը վերահսկող դատախազի հետ կձևակերպենք բոլոր փաստաթղթերը, որպեսզի հաց բերող Արթուր Սարգսյանն ազատ արձակվի»,- ասաց Փաշինյանը:

Հիշեցնենք, որ Արթուր Սարգսյանը, ՀՔԾ-ի միջնորդությամբ, երկրորդ անգամ էր կալանավորել: