Թուրքիայի Սահմանադրական դատարանը մերժել է Կարո Փայլանի պահանջը

Թուրքիայի Սահմանադրական դատարանը մերժել է քրդամետ Ժողովուրդների դեմոկրատական կուսակցության պատգամավոր Կարո Փայլանի՝ խորհրդարանում ելույթից հետո իրեն 3 նիստի մասնակցելու իրավունքից զրկելու ու նրա ելույթը նիստի արձանագրությունից հանելու վերաբերյալ որոշումը չեղարկելու պահանջը:

Ըստ «Ակօս»-ի՝ դատարանը Փայլանի պահանջի մերժումը մեկնաբանել է որպես անհնար պահանջ:

Հիշեցնենք, որ Փայլանը խորհրդարանում սահմանադրական փոփոխությունների վերաբերյալ նախագծի քննարկման ժամանակ նշել էր, որ Թուրքիայում Սահմանադրության առաջին օրինակը կազմվել է հայերի կողմից: Նա շեշտել էր հատկապես այն փաստը, որ դեռևս 1915-ականներին ընդունված փոփոխությունները հանգեցրել էին Ցեղասպանությանը, ինչը մեծ աղմուկի պատճառ էր դարձել: «Ցեղասպանություն»  եզրույթն օգտագործելու պատճառով Փայլանին զրկել էին հետագա երեք նիստի մասնակցության իրավունքից:

Նա այդ մասին իր դժգոհությունը հայտնել էր Սահմանադրական դատարանին, որին, ըստ երևույթին, չեն բավարարել հայ պատգամավորի ներկայացրած փաստարկները: