Հրանտ Բագրատյանը կլինի մեր վարչապետի թեկնածուն. «Ազատ դեմոկրատներ» կուսակցության փոխնախագահ

Ազատ դեմոկրատներ կուսակցության փոխնախագահ Անժելա Խաչատրյանը Yerkir.am-ի հետ զրույցում նշեց, որ իրենք  առաջիկա խորհրդարանական ընտրություններին մասնակցելու են «Ազատ դեմոկրատներ» կուսակցության լայն կոնսոլիդացիա ապահովող համապետական ցուցակով: «Ստեղծում ենք յուրովի դաշինք, որտեղ իրենց ուրույն տեղն ու դերն ունեն «Ազատություն» և «Ազատ դեմոկրատներ» կուսակցությունների անդամները, ինչպես նաև այն բոլոր անկուսակցական անհատները, որոնք մեր գաղափարակիցն են և կիսում են մեր առաջ քաշած քաղաքական պլատֆորմը»,- ասաց նա:

Մեր հարցին՝ Հրանտ Բագրատյանը իրենց ցուցակի երկրորդ համա՞րն է լինելու, Խաչատրյանն արձագանքեց. «Մեր միասնական ցուցակը գլխավորելու է Խաչատուր Քոքոբելյանը, իսկ Հրանտ Բագրատյանը կլինի մեր ցուցակի վարչապետի թեկնածուն»:

Խաչատրյանը նաև նշեց, որ Անահիտ Բախշյանը կլինի ցուցակի առաջին կին թեկնածուն,  իսկ ահա համամասնական և ռեյտինգային ցուցակները առաջիկայում պարզ կլինեն և 16-ին արդեն կներկայացնեն ԿԸՀ:

Yerkir.am-ի տեղեկություններով ցուցակում կլինի նաև Ստյոպա Սաֆարյանը, ով հարթել է տարաձայնությունները «Ազատ դեմոկրատներ» կուսակցության հետ և ամենայն հավանականությամբ կլինի ցուցակի երրորդ համարը: