Թբիլիսիում «Ռուսթավի ազոտ» գործարանի հեռացված աշխատակիցները բողոքի ակցիա են իրականացրել

Մի քանի հարյուր մարդ այսօր՝ փետրվարի 7-ին Թբիլիսիի կենտրոնում ակցիա են իրականացրել՝ պահանջելով «Ռուսթավի ազոտ» քիմիական գործարանից հեռացված աշխատակիցների վերականգնումը: Ցույցին դուրս են եկել արհմիությունների, ոչ կառավարական կազմակերպությունների ներկայացուցիչներ և ուսանողներ, հայտնում է «Sputnik-Վրաստան»-ը:

Ցուցարարներն ակցիան սկսել են Վարդերի հրապարակում և Ռուսթավելի պողոտայով երթով, մասամբ փակելով ճանապարհը, հասել մինչև Ազատության հրապարակ, որտեղ գտնվում է «Վրաստանի բանկի» կենտրոնական գրասենյակը:

 Ակցիայի մասնակիցների խոսքերով՝ հենց «Վրաստանի բանկին» է պատկանում ընկերությունը, որը դարձել է քիմիական գործարանի սեփականատերը: Հունվարին կրճատման տակ է հայտնվել մոտ 350 մարդ:

Նշվում է, որ ակցիայի ընթացքում բախումներ են տեղի ունեցել ոստիկանության հետ:

Նախկին աշխատակիցները մտադիր են հայցով դիմել դատարան՝ պահանջելովիրենց անմիջապես վերադարձնել աշխատանքի: Ակցիայի մասնակիցները նշում են, որ ակցիան կշարունակվի այնքան, մինչև չկատարվեն իրենց պահանջները: Նրանք հանդիպում ենպահանջում Վրաստանի նախագահի և վարչապետի հետ: