Չգիտեմ, թե Ադրբեջանն ինչ խաղեր կտա. Նալբանդյանը չհաստատեց ԱԳ նախարարների հանդիպման մասին լուրը

Այսօր ԱԳ նախարար Էդվարդ Նալբանդյանից լրագրողները հետաքրքրվեցին, թե ինչ նորություն կա ԼՂ կարգավորման բանակցային գործընթացից: Նախարարը նշեց, որ Ադրբեջանն անընդմեջ փորձում է խոչընդոտել Հայաստանի և ԵԱՀԿ ՄԽ գործադրած ջանքերին` ուղղված ԼՂ հակամարտության` բացառապես խաղաղ կարգավորմանը:

«Ադրբեջանն այնպես խեղաթյուրեց ձեռք բերված պայմանավորվածությունները, որ ՄԽ համանախագահները դա անվանեցին այլասերում` ստիպված լինելով անընդհատ կրկնել, որ պետք է պահպանել հրադադարի ռեժիմը և ձեռնամուխ լինել նախկինում ձեռք բերված պայմանավորվածությունները կյանքի կոչելուն, այն է` հետաքննության մեխանիզմների ստեղծում, ԵԱՀԿ գործող ներկայացուցչի թիմի լիազորությունների ընդլայնում»,- ասաց Նալբանդյանը:

Նախարարն ընդգծեց, որ կարելի է խոսել ոչ թե բանակցությունների, այլ հանդիպումների մասին: Եռանախագահների կողմից առաջարկվել է հանդիպում կազմակերպել Հայաստանի ու Ադրբեջանի ԱԳ նախարարների միջև Մյունխենի անվտանգության կոնֆերանսի նախաշեմին:

«Մենք երբևէ չենք հրաժարվում այդ հանդիպումներից, ես այս պահին չեմ կարող հաստատել երկու երկրների ԱԳ նախարարների միջև հանդիպումը, որովհետև չգիտենք` ինչ խաղեր կտա Ադրբեջանն այս անգամ, ինչպես դա եղավ Համբուրգում կամ դրանից առաջ: Պայմանավորվում ենք մի բան, հետո նրանք ձևացնում են, թե ինչ-ինչ պատճառներ կան, կամ մեղադրում  են Հայաստանին և այլն: Դա աբսուրդ է: Համբուրգում նրանք ասացին, թե հանդիպում ընդհանրապես չի կայացել, մինչդեռ նման հանդիպում եղել էր` եռանախագահների ներկայությամբ և ԱԳ նախարարների մասնակցությամբ: Ասացին, թե այդ հանդիպումը եղել է ճաշի ընթացքում, բայց ի՞նչ տարբերություն, եղել է, չէ՞, հանդիպում: Տեսնենք` գուցե ԱԳ նախարարների միջև հանդիպում լինի, եթե Ադրբեջանը չհրաժարվի»,- ասաց Էդվարդ Նալբանդյանը: