Հավանական է` Սեյրան Օհանյանը գլխավորի ցուցակը. Վարդան Օսկանյան

Պաշտպանության նախկին նախարար Սեյրան Օհանյանի հետ համագործակցության վերաբերյալ բանակցություններն արդեն ավարտվել են. այսօր «Ազատություն» ռադիոկայանին տված հարցազրույցում ասել է «Համախմբում» կուսակցության նախագահ Վարդան Օսկանյանը`  հստակեցնելով, որ Սեյրան Օհանյանի հետ միասին են հանդես գալու առաջիկա ընտրություններում:

«Այս պահին Սեյրան Օհանյանը կուսակցական չէ, կարծում եմ` այդպես էլ կմնա, որովհետև մենք դաշինքը ընդլայնելու խնդիր ունենք: Դա նաև մեզ հնարավորություն կտա տարբեր տեսակի ձևաչափեր անելու հետագայում, երբ որ այլ դաշինքներ կամ այլ քաղաքական ուժեր մեզ միանան»,- ասաց նա:

Հարցին, թե տարակուսելի չէ՞, որ Սեյրան Օհանյանը, տարիներ շարունակ գտնվելով իշխանության մեջ, պաշտոնաթող լինելուց հետո հանդես է գալիս ընդդիմադիր դիրքերից, Վարդան Օսկանյանը պատասխանեց, որ ցանկացած հայրենասեր մարդ, ով մտահոգված է երկրի ապագայով, կգնար նման քայլի: Ըստ նրա` հավանաբար հենց Սեյրան Օհանյանը կգլխավորի ցուցակը:

Ինչ վերաբերում է Ծառուկյան դաշինքին միանալուն, Օսկանյանը դա չբացառեց: