Օհանյան-Օսկանյան դաշինքի ցուցակը կոորդինացնում է Սամվել Բաբայանը. Վիկտոր Դալլաքյան

ԼՂՀ պաշտպանության նախկին նախարար Սամվել Բաբայանը կոորդինացնում է Սեյրան Օհանյանի և Վարդան Օսկանյանի քաղաքական ուժերի ցուցակների հետ կապված հարցերը: Այս մասին այսօր լրագրողներին ասաց «Երրորդ հանրապետություն» կուսակցության նախագահ Վիկտոր Դալլաքյանը:

Նրա խոսքով՝ այդ ցուցակը գլխավորելու է Սեյրան Օհանյանը, նրան հաջորդելու են «Ժառանգություն» կուսակցության ղեկավար Րաֆֆի Հովհաննիսյանը, «Համախմբում» կուսակցության նախագահ Վարդան Օսկանյանը: Ցուցակը շարունակելով` Դալլաքյանը ներկայացրեց, որ հաջորդը Էլինար Վարդանյանն է, ապա` Անդրանիկ Թևանյանը, Վահե Հովհաննիսյանը, «Ժառանգություն» կուսակցության փոխնախագահ Արմեն Մարտիրոսյանը, և ևս երեք անդամից հետո միայն` 11-րդ հորիզոնականում, լինելու էր ինքը:

Չնայած դրան` Դալլաքյանը վստահեցրեց, որ դա չէ պատճառը, որ հրաժարվեց համագործակցությունից, այլ այն, որ Օհանյանի շուրջ ստեղծված կուսակցությունների համագործակցության հիմքում կուլիսային և ոչ հրապարակային գործունեությունն էր: