2016-ին որքան գումար է ծախսել քաղաքապետարանը կանաչապատման և լուսավորման համար

Այսօր` լրագրողների հետ հանդիպման ժամանակ, քաղաքապետարանի 2016-ի աշխատանքները /կանաչապատման, շինարարության և սոցիալական ոլորտներում/ ամփոփեց Երևանի քաղաքապետի տեղակալ Կամո Արեյանը:

Նա տեղեկացրեց, որ 2016-ին կանաչապատման համար քաղաքապետարանին է տրամադրվել 1,7 մլրդ դրամ, իսկ շինարարության և բարեկարգման համար` 5 մլրդ դրամ: 2017-ին քաղաքապետարանին տրամադրված բյուջեն մի փոքր ավելացել է` շինարարության և բարեկարգման համար 5 մլրդի փոխարեն 5,8 մլրդ է տրամադրվել, իսկ կանաչապատման համար տրամադրված գումարը գրեթե նույնն է մնացել:

«Բացի այդ` 2016-ին 3,2 մլրդ դրամ էլ ծախսվել է լուսավորման վրա, իսկ բնակելի շենքերում տարվող աշխատանքների վրա` 1,5 մլրդ դրամ: 2013-2016թթ. 88 փողոց է հիմնանորոգվել և մեծ մասամբ` ծայրամասերում: Հաճախ կարող եք տեսնել, որ կենտրոնի ինչ-որ հատվածում աշխատանքներ են կատարվում և թվում է` տարին մի քանի անգամ ասֆալտապատման աշխատանքներ են գնում հենց կենտրոնում, բայց իրականում ստորգետնյա հաղորդակցուղիների վերանորոգման աշխատանքներ են տարվում, որից բխում է նաև տվյալ տարածքը նորից ասֆալտապատելը»,- ասաց փոխքաղաքապետը: