Մրցակցությունն ու կռիվը տարբեր բաներ են. Շարմազանով

Ազգային ժողովի փոխխոսնակ Էդուարդ Շարմազանովը խորհրդարանում լրագրողների հետ զրույցում ասաց, որ Հանրապետական կուսակցությունը 2017 թվականի նախընտրական մարտավարություն, ցուցակների` թե' համամասնական, թե' ռեյտինգային, մանրամասներ, դաշինքների հետ կապված հարց չի քննարկվել:

«Եվս մեկ անգամ հստակեցնում եմ` մենք որևէ նախընտրական ֆորմատ` ցուցակում ով կընդգրկվի, ով չի ընդգրկվի, ով կգլխավորի, ով չի գլխավորի, ով կլինի, ով չի լինի, չենք քննարկել, բայց տրամաբանությունը հուշում է որ մենք կարող ենք գնալ այն ճանապարհով, որով գնացել ենք նախորդ ընտրություններին»,- հայտարարեց Շարմազանովը:

Դիտարկմանը` խոսակցություններ կան, որ էականորեն փոխվելու է ՀՀԿ խմբակցության կազմը, մասնավորապես` ռեյտինգային կարգով մասնակցության, ինչի համար Հանրապետականում կռիվներ են սկսել, նա արձագանքեց. «Մրցակցությունն ու կռիվը տարբեր բաներ են: Առողջ մրցակցությունը պրոգրեսի հայրն է, և այդ իմաստով ժողովրդավարությունն առանց ներկուսակցական առողջ մրցակցության նոնսենս է, բնականաբար, մեր կուսակցությունը խրախուսում է առողջ ներկուսակցական մրցակցությունը»:

Անդրադառնալով ՀՀԿ ռեյտինգային ցուցակին` Շարմազանովը նշեց, որ քաղաքականության մեջ կան գործիչներ, ովքեր ավելի շատ զբաղվում են հրապարակային գործունեությամբ, և կան պատգամավորներ, ովքեր գուցե հրապարակային դաշտում պասիվ են, բայց շատ ավելի ակտիվ են իրենց ընտրողների հետ աշխատանքում: