Քաղաքականության մեջ ոչ միշտ է, որ տղամարդկությունը կարողանում է իր դերը կատարել. Վահրամ Բաղդասարյան

ՀՀԿ խմբակցության ղեկավար Վահրամ Բաղդասարյանն այսօր խորհրդարանական ճեպազրույցներում, անդրադառնալով ԵԱՀԿ-ի վերջին հայտարարությանը, նշեց, որ այն պայմանավորվածությունները, որոնք ձեռք են բերվել Վիեննայում և Սանկտ Պետերբուրգում, պետք է «հոգեհարազատ» լինեն երկու կողմերին էլ: ՀՀԿ-ականի բնորոշմամբ՝ ձեռք բերված պայմանավորվածությունների համաձայն է պետք առաջ շարժվել:

Հարցին, թե հնարավո՞ր է բանակցային գործընթացի այսպիսի պայմաններում Հայաստանի և Ադրբեջանի նախագահներրի միջև հանդիպում տեղի չունենա, Բաղդասարյանը պատասխանեց, որ հայկական կողմն ընդհանրապես չի խուսափում հանդիպումներից:

«Մինսկի խումբը պետք է հավասարության նշանը հանի և հասցեական ասի՝ ում պատճառով է այս ամենը տեղի ունենում»,- ասաց նա՝ հավելելով, որ Մինսկի խմբին բազմիցս այդ հարցերն ուղղվել են, բայց` անարդյունք:

Հարցին` արդյոք չի՞ եկել այն ժամանակը, որ հայկական կողմը «տղամարդավարի» երկու ոտքը դնի մեկ կոշիկի մեջ և պնդի, որ Մինսկի խումբը հասցեական գնահատականներ անի, Բաղդասարյանը պատասխանեց. «Քաղաքականության մեջ ոչ միշտ է, որ տղամարդկությունը կարողանում է իր դերը կատարել: Ես համաձայն չեմ այն որակմանը, որ Մինսկի խումբն ադրբեջանամետ քաղաքականություն է վարում, նրանք ավելի չեզոք են, զգուշավոր, բայց այդ զգուշավորությունը կարող է երկար տևել»:

Պատգամավորն ընդգծեց, որ ադրբեջանական կողմը շարունակում է իր կեցվածքը, Վիեննայում և Սանկտ Պետերբուրգում բոլորովին այլ կեցվածք է դրսևորում, իսկ, վերադառնալով Ադրբեջան, բոլորովին այլ: Բաղդասարյանն ասաց նաև, թե չի կարծում, որ այս պայմաններում Հայաստանի և Ադրբեջանի նախագահների հանդիպումը կարող է արդյունավետ լինել:

«Մենք միշտ պատրաստ ենք պատերազմի, եթե կարիքը լինի, բայց կարծում եմ, որ Ադրբեջանը պատրաստ է լայնամասշտաբ պատերազմի: Այս վիճակը ձեռք չի տալիս ո՛չ Ադրբեջանին, ո՛չ Հայաստանին»,- ասաց ՀՀԿ-ական պատգամավորը: