Արցախում մահացած 20-ամյա Ալբերտը դուդուկահար էր. մանրամասներ (լուսանկարներ)

Գիշերը ՊԲ հյուսիսարեւելյան (Մարտակերտ) ուղղությամբ տեղակայված զորամասերից մեկի պահպանության տեղամասում դեռեւս չպարզված հանգամանքներում մահացու հրազենային վիրավորում ստացած ժամկետային զինծառայող` 20-ամյա Ալբերտ Պոստոլոկյանը Տավուշի մարզի Դիլիջան քաղաքից էր: Yerkir.am-ի տեղեկություններով` նա բանակ էր զորակոչվել վեց ամիս առաջ:

Մեզ հետ զրույցում Ալբերտին ճանաչողները հայտնեցին, որ նա դուդուկահար էր, սովորում էր Դիլիջանի արվեստի պետական քոլեջում: Քոլեջն ավարտելուց հետո զորակոչվել էր բանակ, ծառայում էր Մարտակերտում:

Մեզ հայտնեցին նաև, որ ընտանիքը տուն չունի, հայրը երրորդ կարգի հաշմանդամ է:

Ավելի վաղ ԼՂՀ ՊՆ-ն հաղորդել էր, որ գիշերվա ընթացքում արձանագրվել է նաև արտակարգ միջադեպ: Դեկտեմբերի 8-ին` ժամը 02.45-ի սահմաններում, հյուսիսարևելյան (Մարտակերտ) ուղղությամբ տեղակայված զորամասերից մեկի պահպանության տեղամասում, դեռևս չպարզված հանգամանքներում, մահացու հրազենային վիրավորում է ստացել ժամկետային զինծառայող, 1996թ. ծնված Ալբերտ Հակոբի Պոստոլոկյանը: Դեպքի մանրամասները պարզելու համար կատարվում է քննություն: