Գույքահարկի համակարգի բարեփոխման հիմքում պետք է դրվի արդարության սկզբունքը. վարչապետ

ՀՀ կառավարության նիստերում տրված առաջին հանձնարարականների շարքում էր չօգտագործվող անշարժ գույքի շահագործման խթանումը: Այս ուղղությամբ իրականացվել է ծավալուն նախապատրաստական աշխատանք, որի արդյունքում առաջադրվել է փոխել գույքահարկի համակարգի հիմնական սկզբունքները և մոտեցումները:

Նախ` գույքահարկի համակարգի բարեփոխման հիմքում պետք է դրվի արդարության սկզբունքը, և այդ սկզբունքի ներքո պետք է սահմանվեն տնտեսական մեխանիզմները: Գույքի գծով առաջացող հարկը պետք է կապակցված լինի տվյալ գույքի շուկայական արժեքի հետ: Բնակելի անշարժ գույքի դեպքում պետք է նախատեսել, որ ոչ բավարար եկամուտներ ունեցող անձանց համար հարկը կարող է հետաձգվել և վճարվել գույքի օտարման դեպքում:

Վարչապետի խոսքով՝ բարեփոխման իրականացումը պետք է լինի փուլային եղանակով` հաշվի առնելով իրականացման տեխնիկակական հնարավորությունները: Մի շարք այլ հարցերի վերաբերյալ դեռևս կատարվում են հաշվարկներ և ճշտվում մոտեցումներ:

«Հանձնարարում եմ ֆինանսների նախարարին` շահագրգիռ կառույցների հետ միասին քննարկել և ամբողջականացնել գույքահարկի համակարգի բարեփոխումների առաջարկությունները, ինչպես նաև դրանց հիման վրա մշակել և մինչև 2017թ. հունվարի 31-ը կառավարության աշխատակազմին ներկայացնել համապատասխան օրենսդրական նախագիծ»,- ասաց  Կարեն Կարապետյանը: