Դատախազին չհաջողվեց տեսանյութերում «հայտնաբերել» Երրորդմասցի Լյովիկին և ընկերներին «սպանողներին»

Էրեբունի և Նուբարաշեն վարչական շրջանների ընդհանուր իրավասության դատարանում շարունակվեց քրեական հեղինակություն Երրորդմասցի Լյովիկի՝ Լևոն Ղազարյանի և նրա երկու ընկերների սխանության գործով հերթական դատական նիստը: Այսօր դատարանը հետազոտեց դեպքի օրը գործով երեք ամբաստանյալների շարժն «արձանագրած» տեսագրությունները: Խոսքը վերաբերում է Էրեբունի վարչական շրջանում գտնվող տարբեր օբյեկտներից առգրավված տեսախցիկների արձանագրություններին:

Ուշագրավ է, որ թեև զննության արձանագրություններում նշված է, թե որ տեսանյութի որ րոպեում են երևում երեք անձինք և նրանց տեղափոխած տաքսի ավտոմեքենան, սակայն դատարանում հրապարակված տեսանյութերից որևէ բան հասկանալի չէր: Մեկ ժամից ավելի տևած զննությամբ` որևէ դրվագում չերևացին երեք երիտասարդներ, առավել ևս` ամբաստանյալները:

Այս կապակցությամբ ամբաստանյալների պաշտպան Լուսինե Սահակյանը դատարանին խնդրեց արձանագրել, որ զննության արձանագրությունն իրականությանը չի համապատասխանում, սակայն մեղադրող դատախազը միջնորդեց հետաձգել նիստը և իրեն ժամանակ տրամադրել այդ տեսանյութերն ուսումնասիրելու և դատարանին ներկայացնելու համար:

Թեև պաշտպանն առարկեց մեղադրողի միջնորդության դեմ՝ նշելով, որ դատական նիստն անհարկի հետաձգվում է, դատարանը բավարարեց այն՝ ևս մեկ «շանս» տալով դատախազին:

Ի դեպ, տեսանյութերի ուսումնասիրությունը նյարդայնացնում էր գործով ամբաստանյալներին և դահլիճում ներկա անձանց, քանի որ դրանցում գործին վերաբերող որևէ հանգամանք ի հայտ չեկավ:

Այս կապակցությամբ նիստը նախագահող դատավոր Արտուշ Գաբրիելյանը նկատողություն արեց ամբաստանյալներից Սարգիս Գրիգորյանին՝ Ծգլին, ասելով. «Ինչո՞ւ եք շտապում, ինչի՞ց եք ուշանում, մեկ է ՝ գնալու եք, խցում նստեք, հեն ա` էստեղ նստած եք, գոնե այստեղ օդը մաքուր է»:

Ի պատասխան՝ Ծգլն արձագանքեց. «Սենց բաներ տեսնում՝ ներվայնանում եմ: Ձեզ հարգում եմ (նկատի ունի դատավորին), դրա համար եմ եկել, թե չէ՝ չէի գա»:

Դատավորը հորդորեց նիստերին նյարդայնացող անձանց՝ չգալ դատերին: «Ինձնից շատ, հաստատ, ոչ մեկ չի ներվայնանում»,-նշեց նա:

Այսպիսով` այսօրվա դատական նիստը հետաձգվեց: