Ջամալ Խաշուկջիի ընտանիքը ներում է նրան սպանողներին

2018-ին Ստամբուլում Սաուդյան Արաբիայի գլխավոր հյուպատոսությունում սպանված սաուդցի լրագրող Ջամալ Խաշուկջիի ընտանիքը հայտարարել է, որ  ներում է մարդասպաններին. ըստ yerkir.am-ի` տեղեկացնում է RT-ն:

«Մենք` նահատակի մահով զոհված Ջամալ Խաշուկջիի զավակները, հայտարարում ենք, որ ներում ենք նրան, ով սպանել է մեր հորը»,- թվիթերյան իր միկրոբլոգում գրել է Սալահ Խաշուկջին` հավելելով, որ իրենց որոշումը հրապարակում են Ռամադանի սրբազան պահքի վերջին գիշերներից մեկը:

Անցյալ տարվա դեկտեմբերին Սաուդյան Արաբիայի դատարանը հինգ մարդու մեղավոր էր ճանաչել լրագրողի մահվան մեջ և դատապարտել մահապատժի: Եվս երեք մեղադրյալ 24 տարվա ազատազրկման էր դատապարտվել: Հետաքննությունը հաստատել էր, որ սպանությունը նախնական մտադրությամբ չի կատարվել:

Խաշուկջին սպանվել էր Ստամբուլում Սաուդյան Արաբիայի գլխավոր հյուպատոսությունում 2018-ի հոկտեմբերի 2-ին: Ավելի ուշ սաուդյան իշխանությունները հայտարարել էին, որ լրագրողը սպանվել է կոնֆլիկտի պատճառով: