Իրավապահները գտել են Երրորդմասցի Լյովիկին սպանողների հետքը

Yerkir.am-ի տեղեկություններով` իրավապահներն արդեն գտել են քրեական հեղինակություն Երրորդմասցի Լյովիկի սպանությունն իրագործողների և պատվիրատուների հետքը, և չի բացառվում, որ առաջիկա օրերին լինեն ձերբակալություններ: Մեր աղբյուրները վկայում են, որ հանցագործության հետքը տանում է բարձրաստիճան պաշտոնյայի հետ կապ ունեցող շրջանակ, սակայն այս պահին զերծ կմնանանք կոնկրետ անուններ տալուց:

Փոխարենը խորհուրդ կտանք ընթերցել մեր նախորդ հրապարակումը, որում Լևոն Ղազարյանի գործունեության և կապերի մասին ուշագրավ մանրամասներ ենք ներկայացրել:

Հիշեցնենք, որ երեկ երեք դիմակավորված անձինք տարբեր տեսակի զենքերից կրակ էին բացել կալանավայրի ավտոկայանատեղիի ուղղությամբ, ինչի արդյունքում սպանվել էին քրեական հեղինակություն Երրորդմասցի Լյովը` Լևոն Ղազարյանը, Դերոն` Դրաստամատ Թադևոսյանը և Մեսրոպ Նազարյանցը: Հանցագործները դեպքի վայրում էին թողել զենքերը և փախուստի դիմել` շարժվելով Նուբարաշենի շենքերի ուղղությամբ: