«Ակօս»-ին սպառնացող թուրք ազգայնականներին դատարանն արդարացրել է

Նախորդ տարվա ապրիլի 24-ին Ստամբուլում գործող հայկական «Ակօս» թերթի խմբագրության շենքի մուտքին սև ծաղկեպսակներ դրած ազգայնականների վերաբերյալ դատարանը արդարացման որոշում է կայացրել. հայտնում է Ermenihaber-ը` վկայակոչելով թուրքական Yeniçağ պարբերականը:

Նշենք, որ թուրքական «Ազգայնական Թուրքիա» կուսակցության և «Թուրանի օջախներ» կազմակերպության ներկայացուցիչները, բացի ծաղկեպսակներ դնելուց, «Ակօս»-ի շենքի դիմաց հայտարարություն էին արել, տեսաձայնագրել և տեղադրել իրենց ֆեյսբուքյան էջում` գրելով. «Մի գիշեր, առանց նախազգուշացնելու, «Ակօս»-ում կհայտնվենք»:

Հայկական թերթին սպառնալու մեղադրանքով հարուցված դատական գործով մեղադրյալներ` «Ազգայնական Թուրքիա» կուսակցության Ստամբուլի գրասենյակի  նախագահ Բիլալ Գյոքչեյուրթը  և  «Թուրանի օջախներ» կազմակերպության նախագահ Էրջան Ուրչարը դատարանում չեն ընդունել իրենց մեղքը՝ պատճառաբանելով, թե իբր իրենց գործողությունները բողոքի ակցիայի բնույթ են կրել: 

Դատարանը վճռել է արդարացնել մեղադրյալներին: