Ես, բանակի հետ կապված ինչ կա, արել եմ ու անելու եմ. Սամվել Ալեքսանյան

Արդեն հայտնել ենք, որ բանակում փոխհատուցման համակարգն ապահովող հիմնադրամի ստեղծման հարցն այսօր ԱԺ-ում առաջին ընթերցմամբ ընդունվեց 102 կողմ և 3 դեմ ձայներով:

ԱԺ ՀՀԿ խմբակցության պատգամավոր Սամվել Ալեքսանյանը, լրագրողների հետ զրույցում անդրադառնալով նշված հիմնադրամին, ասաց. «Ես, բանակի հետ կապված ինչ կա, արել եմ ու անելու եմ: Հիմա ավելի շատ կանեմ` նախագծից հետո: Մեր երեխեքն են, սահմանին կանգնած են, որ մենք հանգիստ քնում ենք, բա խի՞ պիտի չանենք»:

Հարցին՝ չի՞ կարծում, որ պետք է թալանվածն էլ հետ բերվի, արձագանքեց. «Ինձ տենց հարցեր մի՛ տվեք, ես ոչ գիտեմ` թալանել են, ոչ գիտեմ` չեն թալանել: Ինձ խի՞ եք տենց հարց տալիս, ես ի՞նչ կապ ունեմ: Ես էդ գործերի մեջ չկամ: Ինձ հարցնում եք` բանակին օգնելո՞ւ եք, ասում եմ` օգնել եմ ու օգնելու եմ: Մնացած ուրիշ հարցեր մի' տվեք»:

Դիտարկմանը՝ իր անունն էլ է կապվում մենաշնորհի ու բազմաթիվ անօրինականությունների հետ, պատասխանեց. «Վերջացրու թեման փոխում ես ուրիշ կռուգներ մտար»: