Հերմինե Նաղդալյանը հորդորում է չքաղաքականացնել 1000 դրամների հարցը

Այսօր ԱԺ հերթական քառօրյա նիստում շարունակվում է բանակում փոխհատուցման համակարգն ապահովող հիմնադրամի ստեղծման հարցը: Պատգամավորները հանդես են գալիս ելույթներով:

Ելույթ ունեցավ ԱԺ նախագահի տեղակալ, ՀՀԿ-ական Հերմինե Նաղդալյանը: Նա նշեց, որ հարցը համազգային ու համապետական նշանակություն ունի: Հիշեցրեց ապրիլյան օրերին հասարակության միահամուռ աջակցությունը բանակի խնդիրներին, երբ համեստ հնարավորություններ ունեցողներն անգամ շտապում էին աջակցել:

Պատգամավորը չի կարծում, որ, այս օրինագծի հետ կապված, հասարակությունը կըմբոստանա, կփոթորկվի ու կերկփեղկվի:

«Սիրելինե'րս, թողնենք քննարկումները` հարկ է, թե` տուրք, գուցե վերադառնանք ազգային տուրք գաղափարին, որը շատ երկրներում աշխատել է»,- ասաց Հերմինե Նաղդալյանը:

Պատգամավորը հավատում է հիմնադրամի թափանցիկությանը: Նա հերքում է այն կարծիքները, թե այս օրինագիծը քաղաքական մեծամասնության կողմից արվող նախընտրական քայլ է: Հակառակը` պատգամավորը դիմեց ընդդիմախոսներին` հորդորելով այս օրինագիծը չքաղաքականացնել:

«Այս վեհ հարցի քննարկման ժամանակ մաղձ ու կասկածամտություն չպետք է լիներ, ազգ-բանակ գաղափարախոսությունը եկեք սկսենք մեզանից: Հարցը վերաբերում է զինվորին, իսկ մենք այս երկու օրը նրա մասին մոռացանք, հիշեցինք բոլոր խնդիրները՝ կոռուպցիա, թալան, պահածո, բյուջե, մատակարար, հիմնադրամ, դղյակներ, բայց մոռացանք սահմանին կանգնածին՝ հերոսաբար ու անձնվեր»,- ասաց ՀՀԿ-ական պատգամավորը:

Հերմինե Նաղդալյանը հորդորում է իր գործընկերներին` ազգային տուրքի գաղափարը չհամեմատել մուրացկանության հետ, այս օրինագիծը չպետք է կապել թալանի հետ, այլ միմիայն մեր պարտավորության հետ` լուծել զինվորի հարցը: Նա հիշեցրեց Սերժ Սարգսյանի կոչը, որ մեր` քաղաքացիների օգնությամբ կարելի է լուծել դժվար խնդիրները: