Եթե խաղի կանոնները հստակ լինեն... Ջրային տնտեսության պետական կոմիտեի նախագահ

Փորձ է արվելու բյուջեով նախատեսված գումարների մեջ տեղավորվել. այսօր խորհրդարանում լրագրողներին ասաց ՀՀ ջրային տնտեսության պետական կոմիտեի նախագահ Արսեն Հարությունյանը: Նրա խոսքով՝ առաջնային խնդիրներից է` անել ամեն ինչ, որ 2017 թվականի ոռոգման սեզոնի ընթացքում գյուղացիները չունենան ջրի հետ կապված խնդիրներ:

Հարությունյանը նշեց նաև, որ, մինչ այս պաշտոնին անցնելը, շուրջ 7 տարի խմելու ջրի համակարգի հետ է առնչություն ունեցել, և ոռոգման համակարգն իր համար փոքր-ինչ նոր է: «Կարծում եմ` եթե խաղի կանոնները հստակ լինեն, այսինքն՝ գյուղացին պատրաստ լինի վճարել իր օգտագործած ջրի համար, մենք երաշխավորում ենք, որ գյուղի ոռոգման ջրի մատակարարումը չի դադարեցվի»,- ասաց նա:

Ըստ Հարությունյանի` կանեն ամեն ինչ, որ ոռոգման ջրի մատակարարումը լինի անխափան: Սրանից հետո միջոցառումներ պետք է ձեռնարկենք, մեխանիզմներ պետք է դնենք՝ գյուղացու վիճակի բարելավման համար: Գնահատվել են նաև ռիսկերը»,- ասաց նա:

Հարությունյանը հավաստիացրեց նաև, որ իրենց կառույցի՝ մի նախարարությունից մեկ այլ նախարարության ենթակայության տակ անցնելը որևէ խնդիր չի առաջացրել: Նա ասաց, որ օպտիմալացում արվում է նաև իրենց կոմիտեում: «Արաքս-Ախուրյան և Սևան-Հրազդան ջրառների միացումն է: Կարծում եմ, որ կառավարության նիստում հավանություն կտրվի ջրառները միացնելու գաղափարին»,- նշեց նա: