Տրանսպորտի խնդիրները լուծելու համար 3 դրույթ պետք է իրականացվի. Երևանի փոխքաղաքապետ

Երևանի փոխքաղաքապետ Կամո Արեյանը խորհրդարանում լրագրողների հետ զրույցում անդրադարձավ քաղաքի տրանսպորտային խնդրին: Ըստ նրա` քաղաքապետը շատ հստակ, արդարացի նշել է, որ դա մեր քաղաքի առջև ծառացած սուր խնդիրներից է, որին պետք է լուծում տրվի:

«Հայտարարված է մրցույթ, միջազգային խորհրդատու կառույցների հետ մշակվում է թարմացման, արդիականացման պլան: Պետք է իրականացնել երթուղային ցանցի վերանայում, շարժակազմի վերանայում: Այլընտրանք չունենք»,- ասաց Արեյանը:

Նրա խոսքով` քաղաքապետարանը ձերբազատվելու է միկրոավտոբուսներից: «Պետք է անցնենք Երևանում մեծ և միջին տարողության ավտոբուսներ շահագործելուն: Միկրոավտոբուսներից պետք է ձերբազատվենք: Դրա համար մի շարք փաստաթղթեր են մեզ պետք»,- ասաց փոխքաղաքապետը:

Ըստ Արեյանի՝ Երևանում  տրանսպորտի խնդիրը լուծելու համար անհրաժեշտ է իրականացնել մի քանի բաժիններից բաղկացած ծրագիր, և այն արդեն մշակման փուլում է: Տրանսպորտային խնդիրները լուծելու համար, փոխքաղաքապետի խոսքով, պետք է 3 հիմնական դրույթներ իրականացնել: «Դրանք են՝ ամբողջ երթուղային ցանցի վերակազմակերպում, երթուղային պլանի ստեղծում և շարժակազմի հստակ քանակ»,- ասաց նա հավելելով, որ հարկավոր է ունենալ գրագետ ծրագիր: