Տեղեկատվայնացման ոլորտում Հայաստանը կհամագործակցի Տաջիկստանի հետ

Կառավարության վաղվա նիստի օրակարգում կապի, տրանսպորտի և ՏՏ նախարարությունը ներառել է հարց` ՀՀ կառավարության և Տաջիկստանի կառավարության միջև կապի և տեղեկատվայնացման բնագավառներում համագործակցության մասին Համաձայնա­գրի կնքման առաջարկությանը:

Կապը և տեղեկատվայնացումը հանդիսանում են յուրաքանչյուր երկրի տնտեսական և սոցիալական զարգացման կարևորագույն գործոններ: Երկու երկրների միջև կապի և տեղեկատվայնացման ոլորտներում երկկողմ հարաբերությունները սերտացնելու և փոխադարձ շահավետ համագործակցություն ձեռքբերելու նպատակով Հայաստանի Հանրապետության և Տաջիկստանի Հանրապետության կառավարության միջև նախատեսվում է ստորագրել կապի և տեղեկատվայնացման ոլորտում համագործակցության  վերաբերյալՀամաձայնագիր:

Սույն Համաձայնագիրը հնարավորություն կտա Հայաստանի Հանրապետության և Տաջիկստանի Հանրապետության միջև հաստատել միջկառավարական համագործակցություն և կառուցել փոխշահավետ հարաբերություններ` նպատակ ունենալով միավորել երկու երկրների ջանքերը տեղեկատվայնացման, տեղեկատվական տեխնոլոգիաների և փոստային կապի ոլորտների զարգացման գործում:

 Համագործակցությունը կլինի լայնածավալ և կներառի այնպիսի ասպեկտներ, ինչպիսիք են` պետական իշխանության մարմինների և տեղական ինքնակառավարման մարմինների գործունեության կազմակերպման կատարելագործման համարտեղեկատվական տեխնոլոգիաների օգտագործումը, ուսումնական հաստատությունների համակարգչայնացումը և հեռավոր ուսուցումը, էլեկտրոնային առևտրի զարգացումը, ինչպես նաև առողջապահության ոլորտում տեղեկատվական տեխնոլոգիաների օգտագործումը և այլն:

Համաձայնագիրը փոխշահավետ պայմաններով կերաշխավորի Հայաստանի Հանրապետության և Տաջիկստանի Հանրապետության տարածքներով հեռահաղորդակցության, տեղեկատվական տեխնոլոգիաների, փոստային առաքումների և հատուկ կապի բոլոր տեսակների ազատ տարանցումը:

Համաձայնագիրը հնարավորություն կտա զարգացնելու փոխադարձ համագործակցությունը Հայաստանի Հանրապետության և Տաջիկստանի Հանրապետության պետական կառավարման մարմինների միջև, ինչպես նաև գործարար կապեր ստեղծել կապի և տեղեկատվայնացման ոլորտում ներգրավված ընկերությունների և կազմակերպությունների հետ: