Առաջիկայում կրկին կլինեն փոփոխություններ. ՀՀԿ-ական

Առաջիկայում էլ կլինեն փոփոխություններ, և այս պաշտոնանկությանն էլ պետք է նայել կատարվող բարեփոխումների կոնտեքստում. Yerkir.am-ի հետ զրույցում ասաց ՀՀԿ խմբակցության պատգամավոր Հովհաննես Սահակյանը` անդրադառնալով Սուրիկ Խաչատրյանի պաշտոնանկությանը:

Ըստ Սահակյանի` կառավարության նիստի ընթացքում նախագահի խոսքերից ստացվում է, որ պետք է օր ու գիշեր աշխատել, որ նոր փոփոխությունների, նոր բարեփոխումների միջանցիկ դերը կարողանանք կատարել: «Սա շատ կարևոր է: Առաջիկայում էլ կլինեն փոփոխություններ, որոնք ևս պետք է նայել այս կոնտեքստում»,- ասաց պատգամավորը:

Մեր դիտարկմանը` արդյո՞ք այս կամ այն փոփոխությունը կապված չէ պաշտոնյայի թերացման հետ, մանավանդ` Խաչատրյանի դեպքում, քանի որ նա միշտ սկանդալների կենտրոնում է, մեր զրուցակիցը ասաց. «Բնականաբար, եթե փոփոխությունը կա, կա նաև պատճառը: Ես չեմ տիրապետում, թե ինչում չի գոհացրել նա կամ գուցե թերացել է իր աշխատանքում կամ չի թերացել: Ես չեմ տիրապետում այդպիսի ինֆորմացիայի:  Ընդհանուր փոփոխությունների կոնտեքստում եմ նայում նաև այս փոփոխությանը»: