Խնդիրը Տիգրան Ուրիխանյանը չէ, ես երևույթին եմ արձագանքել. Էդուարդ Շարմազանով

Ազգային ժողովի փոխնախագահ Էդուարդ Շարմազանովը yerkir.am-ի հետ զրույցում անդրադարձավ երեկ  Տիգրան Ուրիխանյանի` ԱԺ ամբիոնից ելույթին, որին ինքը շատ խիստ արձագանք էր տվել: Ըստ նրա՝ ինքը երևույթին է արձագանքել և որևէ մեկին վիրավորելու նպատակ չի ունեցել:

«Խնդիրը Տիգրան Ուրիխանյանը չէ, ես երևույթին եմ արձագանքել և որևէ մեկին վիրավորելու նպատակ չեմ ունեցել: Ես պարզապես՝ որպես նիստը վարող, գտնում եմ, որ պառլամենտում բոլորս` ինձնից սկսած մինչև Տիգրան Ուրիխանյանը, պետք է խոսենք պառլամենտական բառապաշարով»,- ասաց Շարմազանովը:

Հետո անկեղծացավ. «Այնպես չէ, որ ես միշտ խոսել եմ պառլամենտական բառապաշարով, այնպես է եղել, որ ես էլ չափերս անցել եմ, ինչի համար զղջում եմ: Դրա համար եմ ասում, որ մենք պետք է կարողանանք հնարավորինս ճաշակ թելադրել, կոռեկտության մեջ աշխատել»: