«Բալասանյան» դաշինքի վստահված անձը հանձնաժողովի անդամների համար քաղցրավենիքով հյուրասիրություն է կազմակերպել

«Քաղաքացի դիտորդ» հասարակական կազմակերպությունը շարունակում է գրանցել ՏԻՄ ընտրությունների ընտրախախտումները:

Այսպես` Վանաձորի Հ. Աբելյանի անվան դրամատիկական թատրոնի շենքում` Թատերական փ. 3ա,  30/32 ընտրատեղամասում ընտրացուցակի հետ կապված խնդիրներ  կան: Մայր ու աղջիկ եկել են քվեարկության, սակայն աղջկա անվան դիմաց գրանցամատյանում լրացրել են մոր տվյալները, մոր տվյալների փոխարեն՝ աղջկա տվյալները։ Մայրը նաեւ օգնել է աղջկան քվեարկության ժամանակ, քանի որ աղջիկը առողջական խնդիրներ է ունեցել։ Հանձնաժողովը գրանցել է գրանցամատյանում աղջկա մոր կողմից օգնելու փաստը, ինչպես նաեւ ԿԸՀ-ից ճշտելուց հետո գրանցամատյանում արձանագրել են սխալ լրացված տվյալների փաստը (սլաքներով ցույց են տվել, որ տեղերը սխալ է լրացվել):

Բացի այդ` դիտորդները արձանագրել են 3 դեպք, երբ քվեարկողները քվեախցից դուրս են եկել` առանց քվեաթերթիկը ծրարի մեջ դնելու: Երկուսին դիտորդները զգուշացրել են, որ պետք է ծրարի մեջ դրած քվեախցից դուրս գալ եւ մոտենալ քվեատուփին։ Հանձնաժողովը որեւէ կերպ չի զգուշացնում քվեախցից դուրս եկող անձին, որ քվեաթերթիկը պետք է դնել ծրարի մեջ։ Իսկ դիտորդներին էլ դիտողություն են անում, երբ նրանք են փորձում այդ մասին քվեարկողին զգուշացնել։

Գյումրիում` 34/52  ընտրատեղամասում, մարդկանց կամ մեքենաների կուտակումներ են տեղամասից  50 մետր շառավղով:  ՏԸՀ նախագահին տեղեկացվել է այդ մասին, փորձել է խնդիրը լուծել:

Գյումրու մեկ այլ ընտրատեղամասում` 34/14-ում` թիվ 42 ավագ դպրոց-2-Մուշ-2 թաղամասում,  «Բալասանյան» դաշինքի վստահված անձը հանձնաժողովի անդամների համար քաղցրավենիքով հյուրասիրություն է կազմակերպել։