Խնդիրն այն է՝ կթողնե՞ն նոր վարչապետին աշխատել, թե՞ ոչ

ԲՀԿ-ական պատգամավոր Լյովա Խաչատրյանն այսօր խորհրդարանում լրագրողների հետ զրույցում, խոսելով ՀՀ նորանշանակ վարչապետ Կարեն Կարապետյանից ակնկալիքների մասին, ասաց, որ ցանկանում է նախ տեսնել նրա գործունեությունը, հետո կարծիք հայտնել:

«Ընդունում եմ, որ նա փորձ ունի, աշխատել է: Որտեղ աշխատել է, պատվով է դուրս եկել, կարողացել է կազմակերպել, բայց կանի՞, թույլ կտա՞ն նրան, թե՞ ոչ, կապրենք, կտեսնենք: Երբ գործողությունները տեսնենք, այն ժամանակ էլ նրան կհարցնենք` թո՞ւյլ են տալիս, թե՞ թույլ չեն տալիս»,- ասաց Խաչատրյանը՝ առանց պարզաբանելու՝ ով պետք է թույլ տա:

«2000 տարի, առանց տեսնելու, հավատացել ենք: Հասուն մարդիկ ենք, այսուհետ պիտի տեսնենք, նոր հավատանք: Կաշխատի, կտեսնենք»,- ասաց պատգամավորը:

Ըստ նրա` նախորդ կառավարությունն էլ կարող էր տնտեսությանն ինչ-որ օգուտ տալ, սակայն ոչ մի կառավարություն երբևէ ինքնուրույն ծրագիր չի իրականացրել, այդ պատճառով ներկայիս տնտեսությունն այս վիճակում է:

«Տիգրան Սարգսյանի օրոք մշակվեց ծրագիր, մտան յուրաքանչյուր քաղաքացու գրպանը և շարունակում են մտնել: Կթույլատրվի՞ այս վարչապետին որևէ փոփոխություն իրականացնել, թե՞ ոչ, չգիտեմ: Փաստ է, որ ոչ մի վարչապետ չի կարողանում սեփական ծրագիրն իրականացնել»,- նշեց Խաչատրյանը:

Նա ասաց, որ ցանկանում է տեսնել, որ, օրինակ արագաչափերի գումարները կգնան բյուջե, ինչպես Ռուսաստանում է և մնացած այլ տեղերում: «Այսօր բոլորը վարկի տակ են, բոլորը պարտքի տակ են, բոլորը վազում են բանկ, վարկեր են վերցնում»,- ասաց Խաչատրյանը:

Գնահատելով Հովիկ Աբրահամյանի կառավարման տարիները` նա ասաց. «Գոնե ավելի վատ որոշումներ չկայացվեցին: Նա փորձեց օգնել փոքր ու միջին ձեռնարկատերերին: Առավելությունն այն էր, որ ավելի բացասական քայլեր չկարողացան պարտադրել»: