ԱԺ նոր կանոնակարգ-օրենքը տրամաբանորեն լրիվ այլ նախագիծ է լինելու. Հովհաննես Սահակյան

ԱԺ պետաիրավական հարցերի մշտական հանձնաժողովում մշակվում է ԱԺ նոր կանոնակարգ-օրենքի նախագիծը, որը նոր Սահմանադրության պահանջն է: Yerkir.am-ի հետ զրույցում ԱԺ պետաիրավական հարցերի մշտական հանձնաժողովի նախագահ Հովհաննես Սահակյանը նշեց, որ առաջիկայում այն կբաժանեն ԱԺ խմբակցություններին, որից հետո կդնեն շրջանառության մեջ:

Հարցին, թե փոփոխություններն ի՞նչ չափով են լինելու, Հովհաննես Սահակյանը պատասխանեց, որ տրամաբանորեն լրիվ այլ նախագիծ է լինելու, քանի որ խորհրդարանական կառավարման համակարգն արդեն ենթադրում է լրիվ այլ կանոնակարգումներ: Պատգամավորը նշեց, որ արդեն չորս սուբյեկտ կլինի` կառավարություն, պատգամավորներ, խմբակցություններ և քաղաքացիական հասարակություն, նախկին երկուսի փոխարեն: Կարևոր փոփոխություններ շատ են լինելու, իսկ քննիչ հանձնաժողովը լինելու է այն հիմնական գործիքը,  որը գտնվելու է ընդդիմադիր խմբակցությունների ձեռքին: