Դատապարտյալների հետ երկարատև տեսակցությունների ժամանակ կթույլատրվի հում սննդամթերք փոխանցել

ՀՀ արդարադատության նախարար Արփինե Հովհաննիսյանն այսօր կառավարություն ներկայացրեց որոշման նախագիծ, համաձայն որի՝ դատապարտյալի հետ երկարատև տեսակցության ժամանակ, որպես ծանրոց, հանձնուք կամ փաթեթ, կարող է փոխանցվել նաև ջերմային մշակում պահանջող սննդամթերք: Տվյալ սննդամթերքը կարող է պատրաստվել և օգտագործվել միայն երկարատև տեսակցության ընթացքում:

Այսպիսով` կվերացվի դատապարտյալների հետ երկարատև տեսակցության եկած անձանց կողմից բերված ջերմային մշակում պահանջող սննդամթերքի սահմանափակման արգելքը: Ի դեպ, դատապարտյալների մոտ երկարատև տեսակցության եկած անձինք ևս հնարավորություն կստանան օգտագործելու իրենց կողմից բերված սննդամթերքը:

Նշենք, որ գործող կարգով դատապարտյալին արգելվում է  իր մոտ ունենալ ջերմային մշակում պահանջող սննդամթերք, սահմանափակվում է նաև վերջինիս մոտ երկարատև տեսակցության ժամանակ նման սննդամթերք բերելու և այն օգտագործելու հնարավորությունը, մինչդեռ երկարատև տեսակցության ժամանակ առկա են բոլոր անհրաժեշտ պայմանները ջերմային մշակում պահանջող սննդամթերքի պատրաստման և օգտագործման համար: