Ինձ այդ ծրագրին մասնակցելու առաջարկ արել է ԱՄՆ դեսպանատունը. Միհրան Հակոբյան

Նոյեմբերի 8-ին ԱՄՆ-ում կայանալիք նախագահի ընտրություններին տեղի իշխանություններն տարբեր երկրներից դիտորդներ են հրավիրել ԱՄՆ։

«Հրապարակ» օրաթերթը գրում է, որ ԱՄՆ է մեկնելու նաև ՀՀ երիտասարդ քաղաքական գործիչներից կազմված մի խումբ, որում մեկական ներկայացուցիչ է լինելու ՀՀԿ–ից, ՀՅԴ-ից, «Ազատ դեմոկրատներ»-ից, «Քաղաքացիական պայմանագիր»-ից, «Լուսավոր Հայաստան»-ից… Ի դեպ, թեկնածուների ցուցակը ներկայացրել է Հայաստանում ԱՄՆ դեսպանությունը:

Ըստ թերթի` խմբի նախնական կազմում է եղել նաև «Արարատ» հեռուստաընկերության տնօրեն Միհրան Հակոբյանը, սակայն այժմ նրա անունը չկա վերջնական ցուցակում, պատճառը հուլիսյան իրադարձությունների ժամանակ և դրանցից հետո նրա պահվածքն է, ֆեյսբուքյան գրառումները:

Yerkir.am-ի հետ զրույցում Հակոբյանը նշեց, որ իրեն ծրագրին մասնակցելու առաջարկ արել է դեսպանատունը: «Ես տեղյակ չեմ իրենց որոշումից, և ինձ դեռևս ոչինչ չեն ասել իրենց որոշման մասին»,- ասաց նա: