Պաշտոնանկությունը Աշոտ Կարապետյանի համար պատիժ չէ. Գրիշա Վիրաբյան

Պաշտոնանկությունը Աշոտ Կարապետյանի համար պատիժ չէ, նա պատժված կլինի, եթե օրենքի առջև պատասխանատվության ենթարկվի: Այս մասին Yerkir.am-ի հետ զրույցում ասաց ոստիկանական բաժանմունքում կատարված բռնությունների գործով տուժող, Բելգիայում քաղաքական ապաստան ստացած Գրիշա Վիրաբյանը՝ խոսելով Երևանի ոստիկանապետի պաշտոնից Կարապետյանի ազատման մասին:

Նշենք, որ Վիրաբյանը բազմիցս հայտարարել է, որ 2004-ին ոստիկանական բաժանմունքում իրեն խոշտանգումների է ենթարկել նաև Աշոտ Կարապետյանը:

Մեր զրուցակիցը հայտարարեց, որ ինքն անձամբ ամեն ինչ անելու է, որ Կարապետյանը վերստին պաշտոնի չնշանակվի:

Խոսելով պաշտոնանկության պատճառների մասին` նա նշեց, որ հուլիսյան դեպքերից հետո Կարապետյանը հերթական «ժերտվան էր» փոխոստիկանապետ Լևոն Երանոսյանի եղբորից՝ Լեռնիկ Երանոսյանից հետո: «Հնարավոր չէ, որ նման աղաղակող դեպքերից հետո նա պաշտոնանկ չարվեր: Իմ պայքարը համընկավ այս իրադարձությունների հետ, սակայն իմ նպատակն է, որ Կարապետյանը կանգնի օրենքի առջև»,- ասաց Վիրաբյանը՝ համոզմունք հայտնելով, որ իրավապահ համակարգում պաշտոնանկությունները շարունակական կլինեն:

Հիշեցնենք, որ ՄԻԵԴ վճռից հետո «Գրիշա Վիրաբյանն ընդդեմ Երևանի ոստիկանապետ Աշոտ Կարապետյանի» գործով նոր քրեական գործ էր հարուցվել։ ՀԺԿ նախկին անդամ Գ. Վիրաբյանը գործով ճանաչվել է տուժող և ցուցմունք տվել: Առաջիկայում կպարզենք, թե այս գործով ինչ կարգավիճակ ունի Երևանի` արդեն նախկին ոստիկանապետը: