Միակողմանի զիջումը բացառվում է. Շավարշ Քոչարյան

Այսօր լրագրողների հետ զրույցում ԱԳ փոխնախարար Շավարշ Քոչարյանն անդրադարձավ առաջիկայում Մոսկվայում ՀՀ և ՌԴ նախագահների հանդիպմանը: Նրա խոսքով`  արագ փոփոխվող տարածաշրջանում բազմաթիվ հարցեր կան` քննարկելու, և բնական է` չի շրջանցվելու Ղարաբաղի խնդրի կարգավորման հարցը:

«Տարածքներ զիջելու մասին երբևիցե խոսք չի եղել և չկա,  միակողմանի զիջումը բացառվում է»,- ասաց Շավարշ Քոչարյանը:

Հարցին, թե կարո՞ղ է այդ հանդիպումը բեկումնային լինել ԼՂ կարգավորման խնդրում, պատասխանեց, որ բանակցությունների նախնական հարթությունում Հայաստանն ու Ադրբեջանը պետք է ստեղծեն վստահության որոշակի մթնոլորտ, այն է` շփման գծում չպետք է լինեն սադրանքներ, կրակոցներ, պետք է ներդրվեն հետաքննության մեխանիզմներ: Սակայն Ադրբեջանը ետ է կանգնում իր պայմանավորվածություններից:

Հարցին, թե արդյո՞ք Հայաստանը ԼՂ խնդրի կարգավորման հարցում ճնշում է զգում իր վրա, ԱԳ փոխնախարարը պատասխանեց, որ անտեղին է «ճնշում» բառը գործածելը, որովհետև ցանկացած բանակցային գործընթացում միջնորդները միշտ էլ  փորձում են կողմերին բերել ընդհանուր հայտարարի` կողմերից փոխզիջումներ սպասելով: