Էրդողանի քարոզչությունն իրականացնող կայքը գրաքննության է ենթարկել Պեսկովի խոսքերը

Թուրքիայի նախագահ Ռեջեփ Թայիփ Էրդողանը նամակ էր հղել Ռուսաստանի նախագահ Վլադիմիր Պուտինին` շնորհավորելով նրան Ռուսաստանի օրվա առթիվ և ցանկություն հայտնելով, որ երկու երկրների հարաբերություններն «արժանի մակարդակի» բարձրանան:

ՌԴ նախագահի մամուլի խոսնակ Դմիտրի Պեսկովը հաստատել էր նամակի մասին լուրը՝ նշելով, որ իրենք նույնպես կցանկանան հարաբերությունները բարելավել, սակայն դա անհնար է՝ մինչև Անկարան որոշակի գործողություններ չիրականացնի:

Sputnik-ի համաձայն՝ Էրդողանի նամակին պատասխանելու վերաբերյալ Պեսկովն ասել է, որ  դա այն նամակը չէ, որին պետք է պատասխանել:

Թուրքիաի նախագահի և պետության քարոզչությունն իրականացնող Anadolu գործակալության կայքը, գրաքննության է ենթարկել Պեսկովի խոսքերը՝ հրապարակելով միայն Թուրքիային ձեռնտու հատվածը: «Մենք էլ ենք ցանկանում, որ Թուրքիայի հետ հարաբերությունենրը բարելավվեն. Կրեմլի խոսնակ Պեսկով» վերնագրված հրապարակման մեջ բացարձակապես տեղ չի գտել Պեսկովի հայտարարության մյուս հատվածը:

Թուրքիայի պետական TRT հեռուստաալիքն ու իշխանամետ այլ թերթեր համացանցում լայնորեն տարածել են AA-ի կողմից աղավաղված` Պեսկովի հայտարարությունը: