Ոստիկանացված պետության մասին կարող են խոսել նրանք, ովքեր սարսափելու տեղ ունեն ոստիկանությունից

Ոստիկանապետ Վլադիմիր Գասպարյանի կարծիքով` կորուստներից բացի, ապրիլը տվեց նաև միաբանում,  և դա` միաբանված լինելը, հաղթանակների շարքում պետք է տեսնել: Այսօր Սարդարապատում լրագրողների հետ զրույցում նա պատասխանեց լրագրողների մի քանի հարցերի: 

Հարցին` հնարավո՞ր է ոստիկանական համակարգում կրճատումներ լինեն, պատասխանեց. «Կառավարությունն այդ հարցում կապ չունի: Մենք բարեփոխումների ծրագիրն իրականացնում ենք էտապներով: Դա անընդհատ պրոցես է. կենտրոնական ապարատից, ավելի պասիվ ծառայություններից տեղափոխություններ ենք կատարում»:

Ոստիկանապետը ցանկացավ ճշտել «կրճատումներ» հասկացությունը: Ըստ նրա`  կրճատում են տեղից տեղ տեղափոխվելու հաշվին, կրճատվում են բյուրոկրատական ապարատի հաստիքները:

Դիտարկմանը, թե ԱԺ-ում քննարկվող բյուջեի կատարողականի ժամանակ որոշ պատգամավորները դժգոհել են, որ ոստիկանների հստակ թիվը չի նշվում, և տպավորություն է, որ ապրում ենք ոստիկանական երկրում, Վլադիմիր Գասպարյանը արձագանքեց. «Ոստիկանների թիվը գաղտնի պահելը ոստիկանապետից կախված չէ, դա օրենքով է սահմանված, այն օրենքով, որն ընդունել են հենց պատգամավորները: Ոստիկանացված պետության մասին կարող են  խոսել նրանք, ովքեր սարսափելու, վախենալու տեղ ունեն ոստիկանությունից»:

Անդրադառնալով լրագրող Սիրանույշ Պապյանի դատական հայցին` ընդդեմ իրեն, ոստիկանապետը նշեց, որ դա նրա իրավունքն է, ինքը որևէ մեկին չի վիրավորել, պարզապես ընկալման խնդիր կա: