Հայաստանը, անդամակցելով «Հորիզոն 2020»-ին, ԵՄ-ին ասոցացվեց գիտությամբ

Տեղեկացրել էինք, որ Հայաստանն այսուհետ անդամակցում է «Հորիզոն 2020» ծրագրին: Այսօր` լրագրողների հետ հանդիպման ժամանակ, ՀՀ ԿԳՆ գիտության պետական կոմիտեի նախագահ Սամվել Հարությունյանը նշեց, որ «Հորիզոն 2020»-ը եվրոպական հզորագույն ծրագիր է, որը մեր գիտության համար մի շարք դռներ է բացում:

Ըստ նրա` Հայաստանը, անդամակցելով ծրագրին, ԵՄ-ին ասոցացվեց գիտությամբ:

«Ծրագրին ՀՀ անդամակցությունը հանրապետության գիտական կազմակերպություններին, բուհերին, ինչպես նաև անհատ գիտնականներին ու ասպիրանտներին հնարավորություն կտա մասնակցելու գիտության և տեխնիկայի զարգացման արդի մակարդակին համապատասխանող առաջնակարգ և կարևորագույն հիմնախնդիրների լուծմանն ուղղված ծրագրերի իրականացմանը, ինչպես նաև միջազգային գիտական համագործակցություններին: Այն հնարավորություն կտա օգտվելու եվրոպական գիտական կազմակերպությունների և համալսարանների ենթակառուցվածքներից, բարձրացնելու գիտական հետազոտությունների մակարդակը»,- ասաց Հարությունյանը:

«Հորիզոն 2020»-ին, ըստ նրա, կարող են մասնակցել գիտահետազոտական կենտրոնները, ինստիտուտները, համալսարանները, տեղական և տարածաշրջանային իշխանությունները, փոքր և միջին ձեռնարկությունները:

Հարությունյանը տեղեկացրեց նաև, որ հունիսի 2-4-ը Հայաստան են ժամանելու ԵՄ ներկայացուցիչներ, որոնք կբացատրեն, թե ինչպես կարելի է օգտվել «Հորիզոն 2020»-ի հնարավորություններից: