Մեկը մանկավարժությամբ է զբաղվում, մյուսը` գիտությամբ

Երեկ Ազատության հրապարակում  հրավիրած ասուլիսի ժամանակ երկրի առաջին նախագահը չզլացավ անդրադառնալ իր ժամանակվա «ժողովրդավարությանը»: Սակայն Yerkir.am-ի հետ զրույցում այդ «երանելի» ժամանակներին չցանկացան անդրադառնալ «Ղարաբաղ» կոմիտեի նախկին անդամներ Վազգեն Մանուկյանն ու Դավիթ Վարդանյանը. նրանք առաջիններից էին, որ լքեցին Տեր-Պետրոսյանին:

Վազգեն Մանուկյանը նշեց, որ գիտահետազոտական գործունեությամբ է զբաղվում, Տեր-Պետրոսյանի տարիների «ժողովրդավարության» մասին կարծիքն էլ չի փոխվել. այդ մասին արդեն 10 տարուց ավելի է, ինչ խոսում է: «Եվ բացի այդ` ես զբաղված եմ շատ ավելի կարեւոր հարցերով եւ չեմ պատրաստվում Լեւոն Տեր-Պետրոսյանի ամեն մի հայտարարությանն անդրադառնալ»,- նշեց նա եւ հավելեց, որ եթե ասելու բան ունենա, կա'մ հայտարարությամբ հանդես կգա, կա'մ էլ հարցազրույց կտա:

Մեկնաբանություներից հրաժարվեց նաեւ Դավիթ Վարդանյանը: Նա էլ հայտնեց, թե հիմա քաղաքականությամբ չի զբաղվում, ավելին` այսօր մանկավարժությամբ է զբաղվում: Տեր-Պետրոսյանի «ժողովրդավարության» տարիները նախկին քաղաքական գործիչը` ներկայիս մանկավարժը, հիշել չցանկացավ. մի բան միայն գիտի, որ այդ տարիներին «ժողովրդավարություն, իհարկե, չկար»: