Պահը պատեհ չէ. Արցախի ճանաչման նախագիծն ԱԺ օրակարգ չմտավ

Այսօր խորհրդարանում պատգամավորները վաղ առավոտից քննարկում էին ՀՀ-ի կողմից Արցախի ճանաչման նախագիծը ԱԺ լիագումար նիստի օրակարգ մտցնելու հարցը: Քննարկումից հետո արդեն` նիստի ընթացքում, հարցը դրվեց քվեարկության: 12 կողմ, 0 ձեռնպահ և 0 դեմ ձայներով որոշումը չընդունվեց:

Գրեթե բոլոր պատգամավորներն իրենց ելույթներում հայտարարեցին, որ կողմ են Հայաստանի կողմից Արցախի ճանաչմանը, բայց այդ որոշումը կայացնելու համար պատեհ պահ չէ:

ՀՀԿ խմբակցության ղեկավար Վահրամ Բաղդասարյանը խմբակցության անունից նշեց. «Բնական է, որ բոլորիս վաղեմի նպատակն է ԼՂՀ-ի ճանաչումը: Երբ կգա պատեհ պահը, ես վստահ եմ, որ խնդիրը պետք է դնենք քննարկման, և ոչ միայն ՀՀ-ն, այլ նաև ամբողջ միջազգային հանրությունը կճանաչի Արցախի անկախությունը, բայց այս պահը պատեհ չէ, և ՀՀԿ-ն չի մասնակցի քվեարկությանը»:

ԲՀԿ խմբակցության ղեկավար Նաիրա Զոհրաբյանը ևս նշեց, որ այս պահը պատեհ չէ նման որոշում կայացնելու համար, քանի որ այս որոշման ընդունմամբ սահմանին իրավիճակը կարող է ավելի լարվել: Նշենք, որ ԲՀԿ-ն ևս չմասնակցեց քվեարկությանը: