Զարուհի Փոստանջյանը ողջունում է կառավարության դիրքորոշումը

Արդեն տեղեկացրել ենք, որ կառավարության այս շաբաթվա նիստում ընդգրկված է ԱԺ «Ժառանգություն» խմբակցության ղեկավար Զարուհի Փոստանջյանի ու ՀԱԿ խմբակցության պատգամավոր Հրանտ Բագրատյանի ներկայացրած օրենսդրական նախաձեռնությունը Արցախի Հանրապետությունը ճանաչելու մասին: Կառավարությունը հավանություն է տվել «Արցախի Հանրապետությունը ճանաչելու մա­սին» Հայաս­տանի Հան­րապետության օրենքի նա­խագծի վերաբերյալ Հա­յաստանի Հան­րապետության կառա­վա­­րու­թյան եզրակացության նա­խագծին և այն սահմանված կար­գով կներկայացվի Հայաս­տանի Հան­րապետության Ազ­գա­յին ժողով: Օրենքի նախագիծը Ազգային ժողովում քննարկելիս հարակից զեկուցմամբ հան­դես կգա ՀՀ ԱԳ նախարարի տեղակալ Շավարշ Քոչարյանը:

Զարուհի Փոստանջյանը Yerkir.am-ի հետ զրույցում նշեց` ողջունելի է, որ կառավարությունը ցանկություն ունի այդ օրենքը ընդունել: «Ես կարծում եմ, որ մենք այլընտրանք չունենք և ժամ առաջ պետք է ճանաչենք Արցախի անկախությունը»,- ասաց նա:

Հարցին, թե օրենքի նախագիծը խորհրդարանում ի՞նչ ճակատագրի կարող է արժանանալ, պատասխանեց. «Մենք ուշացել ենք, բայց պարտավոր ենք կողմ քվեարկել, որովհետև եթե չենք անում, սա նշանակում է, որ քաղաքական առումով մենք կորուստներ ենք ունենալու, և, ընդհանուր առմամբ, պատերազմը քաղաքականության մի մասն է, իսկ մենք տեսանք, որ Ադրբեջանը` այդ արհեստականորեն ստեղծված միավորը, պատերազմից չի հրաժարվում, ավելին` շարունակելու է պատերազմել, իսկ մենք մեր քաղաքական որոշումներում պետք է լինենք հստակ և այդ քաղաքական որոշումներով պարտադրենք խաղաղություն»: