Ռուդոլֆ Խառատյանի «Զույգ արեգակներ»-ով կազդարարվի «Ավրորա»-ի բացումը

Ապրիլի 24-ին տեղի կունենա «Ավրորա» մրցանակաբաշխությունը, որի բացման արարողությունն ընձեռված է ՀՀ ժողովրդական արտիստ Ռուդոլֆ Խառատյանի բալետային ներկայացմանը:

Yerkir.am-ի հետ զրույցում Խառատյանը նշեց, որ բացմանը կներկայացնեն մեկ հատված «Զույգ արեգակներ» բալետից /մի փոքր ձևափոխված/:

«Հետո մրցանակը բերում և պատվանդանի վրա ենք դնում` այն մեր պարով արժեքավորելով: Ներկայացման հատվածը սկսվում է հին ծիսական պարից` հասնելով այսօրվա ժամանակակից` Ավետ Տերտերյանի երաժշտությունը»,- ասաց նա:

Ըստ բալետմեյստերի` «Ավրորան» կարևոր մրցանակաբաշխություն է, այն հայերի շնորհակալությունն է նրանց, ովքեր Եղեռնի ժամանակ ձեռք են մեկնել մեզ: «Այսօր մենք պատասխան քայլով ասում ենք` շնորհակալություն, և դրանով դառնում համամարդկային արժեքների կրողներից մեկը` ցույց տալով, որ Հայաստանը համաշխարհային քարտեզի վրա կա, ու մենք էլ ենք այդ արժեքները գնահատում և միանում դրան»,- ասաց Խառատյանը: