Կհստակեցվեն ՌԴ-ից մատակարարվող սպառազինության անվանացանկը, ծավալները, ժամկետները և գները

Այսօր կառավարության նիստում պաշտպանության փոխնախարար Արա Նազարյանը ներկայացրեց որոշում, ըստ որի` ՀՀ կառավարության և ՌԴ կառավարության միջև կնքված համաձայնագրի համաձայն` Հայաստանին տրվում է պետական արտահանման վարկ, և սահմանվում են ռազմական նշանակության արտադրանքի մատակարարման գործընթացում իրավասու պետական մարմինների կողմից իրականացման ենթակա գործողությունները: Կառավարությունը հաստատեց որոշումը:

«Կառավարությունը որոշում է՝  հանձնարարել  ֆինանսների նախարարին իրականացնել հսկողություն  վերոնշյալ համաձայնագրով  հայկական կողմի ստանձնած պարտավորությունների կատարման նկատմամբ: Հանձնարարել նաև պաշտպանության նախարարին՝  հստակեցնել Հայաստանի Հանրապետությանը մատակարարվող ժամանակակից սպառազինության և ռազմական տեխնիկայի անվանացանկը, հանձնարարել  ՌԴ համապատասխան մարմինների (այդ թվում՝ ՌԴ ռազմատեխնիկական համագործակցության Դաշնային ծառայություն և «ՌոսՕբորոնԷքսպորտ» ԲԸ) հետ քննարկել և ստորագրել տրամադրվող վարկի շրջանակներում ժամանակակից ռազմական նշանակության արտադրանքի մատակարարման պայմանագրերը՝  արտացոլելով մատակարարումների ծավալները, ժամկետները և գները: Որոշման նախագծով առաջարկվում է  ՀՀ կենտրոնական բանկի նախագահին՝

ա. Համաձայնագրի 7-րդ հոդվածի դրույթների համաձայն՝ մինչև 2016 թվականի ապրիլի 29-ը Ռուսաստանի Դաշնության «Վնեշէկոնոմբանկ»-ի հետ իրականացնել աշխատանքներ վարկի հաշվառման և հաշվարկների վարման տեխնիկական կարգի մասին համաձայնագիր կնքելու ուղղությամբ,

բ. վարկի հաշվառման և հաշվարկների վարման տեխնիկական կարգի մասին համաձայնագրի ստորագրման մասին հնգօրյա ժամկետում տեղեկացնել ՀՀ ֆինանսների նախարարությանը և ՀՀ պաշտպանության նախարարությանը»,- ասվում է որոշման մեջ: