Մի օր Ռոբերտ Քոչարյանն էլ կփոխի իր կարծիքը. Շարմազանով

ԱԺ փոխխոսնակ, ՀՀԿ մամուլի խոսնակ Էդուարդ Շարմազանովն այսօր լրագրողների հետ հանդիպման ընթացքում անդրադարձավ ՀՀ առաջին նախագահ Լևոն Տեր-Պետրոսյանի և Սերժ Սարգսյանի` նախորդ շաբաթ տեղի ունեցած հանդիպմանը:

«Հանդիպման վերաբերյալ Տեր-Պետրոսյանն իր հարցազրույցում մանրամասներ ներկայացրել է: Մինչև այդ հանդիպումն էլ ես բարձր եմ գնահատել առաջին նախագահի հայտարարությունը, որն ընթերցեց նրանց խմբակցության ղեկավար Լևոն Զուրաբյանը: Դա պետական մտածողության ցայտուն օրինակ էր: Անկախ նրանից՝ ինձ դուր է գալիս առաջին նախագահի քաղաքականությունը, դուր չի գալիս, մենք համամիտ ենք, թե համամիտ չենք, մի բան փաստ է, որ այս ժամանակաշրջանում, պետության և հայրենիքի համար այս վճռական փուլում առաջին նախագահն իրեն պահեց որպես երկրի առաջին նախագահ և որպես պետական մտածողություն ունեցող գործիչ»,- նշեց Շարմազանովը և հավելեց, որ Լևոն Տեր-Պետրոսյանի մասին իր կարծիքը փոխվել է նրա վերջին գործողություններից հետո:

«Իմ կարծիքը կտրուկ փոխվեց` կոնկրետ գործողության հետ կապված: Ես անձին չեմ գնահատական տվել, երևույթին եմ գնահատական տվել` և՛ նախկինում, և՛ հիմա: Ես շատ փոքր մարդ եմ, որպեսզի իմ երկրի առաջին, երկրորդ կամ երրորդ նախագահներին գնահատականներ տամ, բոլորին է վերաբերում: Ինձ դուր է գալիս, թե դուր չի գալիս, նրանք իմ երկրի նախագահներն են եղել` և՛ Լևոն Տեր-Պետրոսյանը, և՛ Ռոբերտ Քոչարյանը, և՛ գործող նախագահ Սերժ Սարգսյանը: Նախագահի ինստիտուտի հանդեպ  գոնե իմ կողմից մշտապես հարգանք եղել է ու կմնա, ինչպես նաև իմ երկրի հոգևոր իշխանության նկատմամբ»,- ասաց ԱԺ փոխխոսնակը:  

Շարմազանովը նշեց նաև, որ  մի օր Ռոբերտ Քոչարյանն էլ կփոխի իր կարծիքը և ցանկություն կհայտնի հանդիպելու Սերժ Սարգսյանի հետ:

«Տա Աստված, որ երկրորդ նախագահն էլ միանա նրանց, որովհետև այսօր մեր օրակարգում բացառապես միասնություն ձևավորելն է մեր հանրության մեջ: Ես արձագանքել եմ նաև հարգելի պարոն Ռոբերտ Քոչարյանին: Կարծում եմ, որ մի օր էլ նա կմտափոխվի և կմիանա համազգային միասնությանը, որովհետև այլ տարբերակ չկա: Մենք պետք է բոլորս լինենք միասնական: Հիմա իրար վրա քարեր շպրտելու ժամանակը չէ, իրար միս ուտելու ժամանակը չէ, հիմա միավորվելու ժամանակն է»,- ասաց ՀՀԿ խոսնակը: