ՀՀԿ քաղաքական դպրոցի սերտիֆիկատը կարևոր է լինելու, բայց անցաթուղթ չի լինելու. Արմեն Աշոտյան

Հայաստանի Հանրապետական կուսակցության  փոխնախագահ Արմեն Աշոտյանն այսօր ՀՀԿ կենտրոնական գրասենյակում  լրագրողների հետ խոսեց կուսակցության առաջիկա ծրագրերի, անելիքների մասին: Նա անդրադարձավ նաև ՀՀԿ-ի կողմից ստեղծվող` երջանկահիշատակ Անդրանիկ Մարգարյանի անվան քաղաքական դպրոցի ստեղծման գաղափարին ու այդ գաղափարը կյանքի կոչելու հեռանկարներին: Աշոտյանի խոսքով` ՀՀԿ-ում նոր ծրագրերի սկիզբ է դրվում, որոնց նպատակն է ամրացնել կուսակցության մտավոր ներուժը`առաջիկա խորհրդարանական ընտրություններին ընդառաջ:

Ի դեպ, Աշոտյանը, իր սովորության համաձայն ակտիվ հետևելով համացանցում շրջանառվող տեսակետներին,  անկեղծացավ և ասաց, որ ՀՀԿ-ի`քաղաքական դպրոց ստեղծելու գաղափարի վերաբերյալ շատ տարբեր մեկնաբանությունների  է հանդիպել: «Ոմանք ցուցաբերեցին հումորի, ոմանք էլ` քաղաքական մաղձի աստիճան, բայց պետք է նկատի ունենանք, որ ՀՀԿ-ն առաջինն է նման դպրոց ստեղծելու նախաձեռնություն ցուցաբերել»,- ասաց նա և ընդգծեց, որ բարձր է գնահատում Միջազգային և անվտանգության հարցերի հայկական ինստիտուտի ղեկավար Ստյոպա Սաֆարյանի` ՀՀԿ-ի այդ գաղափարի ողջունման փաստը:

ՀՀԿ փոխնախագահը նշեց նաև, որ ուսումնական նման կենտրոնները նպատակ ունեն կրթական ծրագրերի միջոցով բարելավել կուսակիցների, կուսակցության համակիրների կրթվածության և զարգացվածության աստիճանը, ինչպես նաև նպաստել նրանց քաղաքագիտական մտքի կայացմանը: Աշոտյանի խոսքով` քաղաքական դպրոցի ստեղծումը մեծ ճանապարհի սկիզբն է, և այդ դպրոցի ստեղծման համատեքստում նախատեսվում է համագործակցություն նաև միջազգային կառույցների հետ: Խոսքը  «Կոնրադ Ադենաուեր» հիմնադրամի, Ավստրիական ժողովրդական կուսակցության և «Միասնական Ռուսաստան»-ի քաղաքական դպրոցների մասին է:

ՀՀԿ փոխնախագահը նշեց, որ քաղաքական դպրոցը ֆինանսավորվելու է ՀՀԿ-ի կողմից:

Տեղեկացնենք նաև, որ, Աշոտյանի խոսքով, աշնանը տեղի կունենա ՀՀԿ-ի համագումարը, որը սկիզբ է դնելու կուսակցության նոր ծրագրի վերանայմանը:

Պատասխանելով դիտարկմանը, թե ՀՀԿ-ական Աշոտ Աղաբաբյանը «դիկտատուրա» է որակել դպրոց ստեղծելու գաղափարը, մինչդեռ հայտնի է, որ ՀՀԿ-ի նախորդ ղեկավարները` Աշոտ Նավասարդյանը և Անդրանիկ Մարգարյանը, պայքարել են «պոլիտշկոլայի» դեմ, Աշոտյանը պատասխանեց. «Դպրոց հիմնելու որոշումը գործադիր մարմնում է կայացվել: Պետք չէ զարմանալ, որ կուսակցության ներսում կա բազմակարծություն: Մինչև որոշման կայացումը մենք տարբեր կարծիքներ լսել ենք»:

ՀՀԿ փոխնախագահը նշեց նաև, որ քաղաքական դպրոցը զուտ քաղաքական գիտելիքների ավելացման միջոց է:  «Քաղաքական դպրոցի սերտիֆիկատը կարևոր է լինելու, բայց անցաթուղթ չի լինելու»,- ասաց նա:

Yerkir.am-ի հարցին, թե ովքե՞ր են դասավանդելու և ուսանելու ՀՀԿ-ի կողմից ստեղծվող քաղաքական դպրոցում, Աշոտյանը պատասխանեց, որ դպրոցում  դասավանդելու են ակադեմիական շրջանակներից հրավիրված մարդիկ, տարբեր քաղաքական գործիչներ, արտասահմանյան պատվիրակության անդամներ: Նա նաև ընդգծեց, որ դպրոցում դասավանդելու հատուկ հրավեր է ուղարկվելու Ստյոպա Սաֆարյանին:

«Կուսանեն ինչպես կուսակիցներ, անպես էլ համակիրներ և ամենատարբեր քաղաքական հայացքների տեր մարդիկ»,- ասաց Աշոտյանը և շեշտեց, որ ՀՀԿ-ական պատգամավորներ Առաքել Մովսիսյանը, Մհեր Սեդրակյանը ո\'չ ուսանելու են այդ դպրոցում, ո\'չ էլ դասավանդելու են:

Պատասխանելով հարցին, թե արդյոք քաղաքական մտքի սով կար, որ հղացավ քաղաքական դպրոց ստեղծելու գաղափարը, Աշոտյանը պատասխանեց, որ դա բոլորովին էլ այդպես չէ, շատ երկրներում ընդունված փորձ է քաղաքական դպրոց ստեղծելը: ՀՀԿ փոխնախագահը նշեց նաև, որ  քաղաքական դպրոցի  դասախոսական կազմը դեռևս հստակեցվում է  և մայիսի վերջին արդեն ամեն ինչ պարզ կլինի:

Հարցին՝ Ձեզ համար նոր աշխատատե՞ղ է ստեղծվում, Աշոտյանը պատասխանեց. «Ինձ համար աշխատատեղ ստեղծված է: Ես աշխատատեղի խնդիր չունեմ, ինչպես գիտեք, ես երգեր եմ գրում, և՛ հեռուստաշոու եմ վարում, և՛ ՀՀԿ փոխնախագահ եմ, և՛ հետաքրքիր զրուցակից ձեզ համար»: 

Նշենք նաև, որ քաղաքական դպրոց ստեղծելու գաղափարի հեղինակը հենց Արմեն Աշոտյանն է: