Դպրոցի նախկին տնօրենի հարսը ձեռքերով փակել է դպրոցի մուտքը և խոչընդոտել երեխաների մուտքին. մարզպետ

Արագածոտնի մարզի Աղձք գյուղի դպրոցի դիմաց, ըստ մամուլի հրապարակումների, գյուղացիները բողոքի ակցիա են իրականացնում տնօրենի ժամանակավոր պաշտոնակատար նշանակված անձի դեմ: Yerkir.am-ի հետ զրույցում, անդրադառնալով խնդրին, Արագածոտնի մարզպետ Գաբրիել Գյոզալյանը նախ հերքեց մամուլի այն տեղեկությունը, թե դպրոցի տնօրենի պաշտոնակատարն իր սանիկն է, ապա հավելեց, որ դպրոցի մանկավարժական կոլեկտիվի 21 ներկայացուցչից 8-ը նախկին տնօրենի բարեկամներն են, և խնդիրն այստեղ շահերին է վերաբերում:

Մարզպետը վստահեցրեց, որ դպրոցի տնօրենի պաշտոնակատար Սոնա Միքայելյանի հետ որևէ բարեկամական ու ազգակցական կապ չունի: «Այդ ամենն ասում էին` ասելու համար: Գնացի, տեղում ամեն ինչ պարզաբանվեց, ամեն ինչ ընկավ իր տեղը: Երեխաներն ուզել են գնալ դասի, նախկին տնօրենի՝ Հարություն Սուքիասյանի հարսը, եկել, ձեռքերով փակել է դպրոցի մուտքը և երեխաներին չի թողել մտնել ներս»,- ասաց Գյոզալյանը՝ ընդգծելով, որ զուտ շահերի խնդիր է, և նախկին տնօրենի հարազատներն ամեն կերպ ուզում են պահպանել իրենց աշխատանքը և չզրկվել եկամտից: